Fransada qeyri-hökumət təşkilatı kimi fəaliyyət göstərən “Jurnalistlər Evi”nin virtual qəzetində Toplum TV-nin həbsdə olan əməkdaşı Fərid İsmayılov haqqında yazı dərc olunub. Məqalənin müəllifi, Fransada yaşayan jurnalist Ülviyyə Kərimova, İsmayılovun “araşdırmaçı reportajları və ictimai məsələlərdə kəskin sualları ilə tanınan” jurnalist olduğunu vurğulayıb.

Məqalədə qeyd olunur ki, ciddi sağlamlıq problemlərinə və beynəlxalq ictimaiyyətin Azərbaycanda mətbuat azadlığı ilə bağlı narahatlıqlarına baxmayaraq, o, hələ də həbsdə saxlanılır.

Jurnalistin vəkili Zibeydə Sadıqova bildirib ki, İsmayılova qarşı irəli sürülən qaçaqmalçılıq, vergidən yayınma və qanunsuz sahibkarlıq ittihamlarını təsdiqləyən heç bir sübut yoxdur:
“Bu, sadəcə Fəridlə bağlı məsələ deyil. Bu, ümumi bir cinayət işidir və Toplum TV əməkdaşları, ictimai fəallar da daxil olmaqla daha doqquz nəfərə qarşı da eyni maddələrlə ittiham irəli sürülüb. Onun əleyhinə nə şəxsi ifadə, nə də sənədləşdirilmiş sübut var”, – deyə vəkil qeyd edib.

Sadıqova həmçinin jurnalistin səhhətində ciddi problemlərin olduğunu, lakin ona müvafiq tibbi yardım göstərilmədiyini açıqlayıb:
“Müvəqqəti müalicələr, məsələn, damar yolu ilə dərmanlar verilir, lakin tibbi qiymətləndirmələr barədə heç bir məlumat təqdim olunmur”, – deyə o əlavə edib.

Fərid İsmayılovun anası Məlahət İsmayılova da oğlunun vəziyyətinin hər gün pisləşdiyini deyib:
“Onun ayaqda dura bilməsi naminə hər həftə damar yolu ilə vurulması üçün maye və dərman aparıram. Hətta onun həkimi də dedi ki, təcriddə qala bilməz, çünki bu, ürək çatışmazlığına səbəb ola bilər”.

Məqalədə həmçinin beynəlxalq təşkilatlar – “Jurnalistləri Qorumaq Komitəsi” və “Sərhədsiz Reportyorlar”ın İsmayılovun pisləşən səhhəti ilə bağlı narahatlıqlarını ifadə etdiyi və onun azadlığa buraxılması ilə bağlı çağırışlarına istinad edilib.

Ülviyyə Kərimova yazır ki, Fərid İsmayılov Toplum TV ilə əməkdaşlığa başladığı 2022-ci ildən bəri araşdırmaçı jurnalistikaya xüsusi diqqət ayırıb, məmur səlahiyyətlərindən sui-istifadə hallarını ifşa edib və hakimiyyət nümayəndələrinə kəskin suallar ünvanlayıb.

Xatırladaq ki, “Toplum TV işi” üzrə ötən il martın 6-da saxlanılan Fərid İsmayılov əvvəlcə polis nəzarətinə verilsə də, bu ilin yanvarın 17-də Xətai Rayon Məhkəməsi onun barəsində həbs qətimkan tədbiri seçib.

Ümumilikdə bu iş üzrə 10 nəfərə cinayət işi açılıb. III Respublika Platformasının spikeri Akif Qurbanov, qurucularından Ruslan İzzətli, Toplum TV-nin həmtəsisçisi Ələsgər Məmmədli, videoredaktor Müşfiq Cabbar, jurnalist Fərid İsmayılov, Demokratik Təşəbbüslər İnstitutunun əməkdaşları Əli Zeynal, İlkin Əmrahov və Ramil Babayev həbs olunublar. Jurnalist Elmir Abbasov polis nəzarətinə, redaktor Şahnaz Bəylərqızı isə əvvəlcə ev dustaqlığına, daha sonra isə polis nəzarətinə buraxılıb.

Onlar əvvəlcə qaçaqmalçılıqda ittiham edilsələr də, sonradan ittiham ağırlaşdırılıb. Həbs edilənlər ittihamları rədd edir və bunun siyasi sifariş əsasında baş verdiyini bildirirlər.

2023-cü ilin noyabrından bəri Azərbaycanda təxminən 30 jurnalist və ictimai fəal oxşar ittihamlarla həbs olunub.