Həbsdə olan jurnalist Polad Aslanov altı gündür aclıq aksiyasına davam edir.

Onun həyat yoldaşı Gülmirə Aslanova “Toplum TV”yə bildirib ki, jurnalist avqustun 29-da aclığa başlayıb. Səbəb kimi isə saxlandığı 15 saylı Cəzaçəkmə Müəssisəsinin tibb məntəqəsindəki mətbəxdən istifadəsinə qoyulan qadağa göstərilir.

Gülmirə Aslanovanın sözlərinə görə, həyat yoldaşı iyulun 18-də keçirdiyi ultrasəs müayinəsinin nəticəsini tələb edir. Lakin müəssisənin tibb məntəqəsinin baş həkimi Cavanşir adlı şəxs onun etirazına cavab olaraq mətbəxdən istifadəyə icazəni ləğv edib.

O əlavə edib ki, Aslanovun bu barədə ərizəsini müəssisə rəisi Ramiq Nəsibov qəbul etmir. Şikayət həmçinin Ədliyyə Nazirliyinin Tibb Baş İdarəsinə də göndərilib. Şikayətdə yalnız müayinənin nəticələrinin verilməməsi deyil, həm də jurnalistin tibb məntəqəsinə buraxılmaması qeyd olunub.

“Polad Aslanov ötən ilin noyabrında 15 saylı Cəzaçəkmə Müəssisəsinə köçürüləndən cəmi 38 gün tibb məntəqəsində saxlanılıb. Daha sonra zona keçirilib. Buna baxmayaraq, gündə yarım saat tibb məntəqəsinin mətbəxindən istifadə etməsinə şərait yaradırdılar. İndi isə ona tamamilə qadağa qoyublar”, – Gülmirə Aslanova deyib.

O, ultrasəs nəticələrinin gizlədilməsini məqsədyönlü hesab etdiyini bildirərək əlavə edib:
“Polad Aslanovun sağlamlığı ilə oynayırlar. Cavabı gecikdirməklə qaraciyərindəki problemin dərinləşməsini gözləyirlər”.

Ailə Ombudsmana da müraciət edib. Qurum şikayəti Ədliyyə Nazirliyinin Tibb Baş İdarəsinə göndərib. Cavab məktubunda Aslanovun 2020-ci ildə “praktiki sağlam” kimi qeydiyyata alındığı yazılıb.

Polad Aslanov 2019-cu ildə casusluq ittihamı ilə həbs olunub. O, ittihamları rədd edir və hökumətdə korrupsiya faktlarını ifşa etdiyinə görə təqib olunduğunu bildirir. Hüquq müdafiəçiləri Aslanovu siyasi məhbus kimi tanıyırlar. Avropa Məhkəməsi də onun həbsi ilə bağlı Azərbaycana qarşı qərar çıxarıb.