Almaniyanın Passau şəhərində sosial-siyasi birlik “Demokratik Azərbaycanı Seç” (DAS) təşkilatının fəalları cümə axşamı etiraz aksiyası keçirib. Almaniya mətbuatının diqqət yetirdiyi tədbirdə əsas mövzu Azərbaycanda insan haqlarının pozulması olub.

Fəallar mitinqdə çıxış edərək Azərbaycanda hakim Əliyev ailəsinin idarəçiliyi altında mövcud olan avtoritar idarəçiliyin sona çatmasını tələb ediblər. Onlar beynəlxalq ictimaiyyəti, xüsusilə Avropa İttifaqı və üzv ölkələri ölkədəki siyasi məhbuslar məsələsində daha prinsipial mövqe tutmağa çağırıblar.

Etirazçılar xatırladıblar ki, Amnesty International, Human Rights Watch, Reporters Without Borders, Freedom House və Avropa İttifaqı institutları mütəmadi hesabatlarında Azərbaycanda insan hüquqlarının davamlı şəkildə pozulduğunu qeyd edirlər. Hüquq müdafiəçilərinin məlumatına görə, 2024-cü ilin fevralında Azərbaycanda 357 siyasi məhbus qeydə alınıb, Avropadan geri qaytarılan bəzi şəxslər həbs olunaraq işgəncələrə məruz qalıb.

Fəallar həmçinin 2023-cü ilin noyabrından bəri jurnalistlərə qarşı kütləvi həbslərin artdığını, xaricdə yaşayan fəallara və onların ailələrinə təzyiqlərin müşahidə edildiyini vurğulayıblar.

Aksiya iştirakçıları Avropa İttifaqını və beynəlxalq qurumları Azərbaycan hakimiyyəti ilə insan hüquqları məsələsində birbaşa dialoqa, sanksiyaların tətbiqinə və vətəndaş cəmiyyəti institutlarının daha güclü şəkildə dəstəklənməsinə çağırıblar.