USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Əhməd Məmmədlinin gözündə çürümə getdiyi bildirilir
Həbsdə olan jurnalist və ictimai fəal Əhməd Məmmədlinin bir gözündə çürümə getdiyi açıqlanıb. Bu barədə onun Hüquqlarını Müdafiə Komitəsi məlumat yayıb.
Komitənin açıqlamasına görə, Ədliyyə Nazirliyi Tibb Baş İdarəsi fəalın vəkili Elçin Sadıqovun tibbi təminatla bağlı müraciətinə cavab verib. Bildirilib ki, mayın 29-da təcridxanaya dəvət olunan oftalmoloq Məmmədliyə “xorioretinal distrofiya” diaqnozu qoyub və ambulator müalicə təyin edib.
Komitə həmçinin xatırladıb ki, Əhməd Məmmədli genetik astma xəstəsidir və saxlanılarkən polis tərəfindən işgəncələrə məruz qalıb. Onun əvvəllər əməliyyat olunan gözlərinə zərbələr endirildiyi, nəticədə bir gözünün tamamilə bulanıq gördüyü bildirilir.
Açıqlamada qeyd olunur ki, 3 sentyabr 2025-ci ildə fəal barəsindəki cinayət işi üzrə məhkəmə iclası təxirə salınıb:
“Bununla da, Əhmədin həbsdə qalma müddəti uzadılır. Bu isə onun sağlamlığı üçün ciddi təhlükədir. Həbsxana şəraiti onun səhhəti ilə uyğun gəlmir. Əhməd Məmmədlinin ev dustaqlığına buraxılmasını tələb edirik”.
Əhməd Məmmədli mayın 6-da saxlanılıb, mayın 8-də isə barəsində 4 aylıq həbs qətimkan tədbiri seçilib. O, Cinayət Məcəlləsinin sağlamlığa qəsdən ağır zərər vurma və xuliqanlıq maddələri ilə ittiham olunur.
Məmmədli isə ittihamları qəbul etmir və həbsini jurnalist və ictimai-siyasi fəaliyyətinə görə cəza kimi qiymətləndirir.
