“AbzasMedia”nın həbsdə olan jurnalisti Nərgiz Absalamova beynəlxalq “AzadMedia” mükafatına layiq görülüb. Mükafat Norveçin Fritt Ort və Almaniyanın ZEIT Stiftung Bucerius fondları tərəfindən təqdim olunur və Mərkəzi və Şərqi Avropada müstəqil media qurumlarına, peşəkar və cəsarətli jurnalistlərə verilir.

Təltifdə qeyd olunub ki, Absalamova cəsarətli reportajları və qısametrajlı sənədli filmlərinə görə mükafata layiq görülüb:

“O, fəaliyyətini iqlim problemlərinin, korrupsiyanın və sosial hüquqların işıqlandırılmasına həsr edib. Həssas icmalardan olan insanlara, eləcə də ayrı-seçkiliklə üzləşən qadınlara və gənclərə səs verib. Onun videoreportajları sosial şəbəkələrdə milyonlarla baxış qazanıb və vətəndaş cəmiyyətinə müsbət təsir göstərib. Onun kamerası səlahiyyətlilər tərəfindən müsadirə olunub və o, bir neçə dəfə polis zorakılığına məruz qalıb”.

Bu il mükafata layiq görülənlər sırasında həmçinin Ukraynadan “Gwara Media”, Gürcüstandan jurnalist və media qurucusu Mzia Amaglobeli, Macarıstandan araşdırmaçı onlayn media Direkt36, Rusiyadan fotojurnalist Aleksandra Astaxova və Belarusdan Belarusian Investigative Center də yer alıb.

Təqdimat zamanı həmçinin vurğulanıb ki, Azərbaycanda qadın jurnalistlərin həbsi onların ictimai həyatdan uzaqlaşdırılması cəhdi kimi qiymətləndirilir:

“Son aylarda Azərbaycanda 9 qadın jurnalist iqtisadi ittihamlarla həbs edilib. Bu hücumlar gender baxımından neytral deyil, qadın jurnalistləri ictimai həyatdan uzaqlaşdırmaq məqsədi daşıyır. Bu, təkcə Azərbaycanda mətbuat azadlığı üçün deyil, ümumilikdə avtoritar ölkələrdə qadın jurnalistlərin fəaliyyət azadlığı üçün təhlükədir”.

Xatırladaq ki, Nərgiz Absalamova 2025-ci il iyunun 20-də Bakı Ağır Cinayətlər Məhkəməsinin hökmü ilə 8 il azadlıqdan məhrum edilib. O, qaçaqmalçılıq və digər cinayətlərdə təqsirli bilinib. Hazırda “AbzasMedia işi” üzrə daha 6 jurnalist həbsdədir.

Absalamova irəli sürülən ittihamları qəbul etmir, həbsinin jurnalist fəaliyyəti ilə bağlı olduğunu bildirir. Yerli və beynəlxalq hüquq müdafiə təşkilatları isə bu həbsləri siyasi motivli hesab edir və jurnalistlərin azad edilməsinə çağırırlar.