USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
“Varşavada keçiriləcək beynəlxalq tədbirdə iştirak insan hüquqları səslərinin eşidilməsi üçün bir fürsətdir”
Azərbaycan hakimiyyətinin davam edən siyasi həbsləri və repressiyaları ilə bağlı çıxış edən hüquq müdafiəçiləri ölkə daxilində və xaricdə təzyiqlərin artdığını bildirirlər. Onların sözlərinə görə, jurnalistlər, siyasətçilər və vətəndaş cəmiyyəti nümayəndələri söz və ifadə azadlığından məhrum edilir.
Uzun illərdir siyasi təzyiqlərlə üzləşən və fəaliyyətinə görə Gürcüstana sığınan bir QHT rəhbəri açıqlamasında bildirib ki, artıq 8 ildir bu ölkədə yaşasa da, Azərbaycanın təzyiqləri nəticəsində beynəlxalq tədbirlərdə iştirak imkanları məhdudlaşdırılıb:
“Beynəlxalq toplantılara dəvət olunsa da, Gürcüstandan çıxışımız mümkün olmayıb. Yalnız bəzi tədbirlərə onlayn qoşula bilmişik. ATƏT-in Demokratik Təsisatlar və İnsan Haqları Bürosu (DTİHB) tərəfindən dəfələrlə dəvət almışıq, amma iştirak edə bilməmişik”.
Hüquq müdafiəçisi qeyd edib ki, bu dəfə 6–17 oktyabr 2025-ci il tarixlərində Varşavada keçiriləcək beynəlxalq tədbirə viza müraciəti təsdiqlənib və Gürcüstandan çıxışına icazə veriləcəyinə ümid edir:
“Uzun illərdir insan haqlarının müdafiəsi sahəsində çalışan bir QHT rəhbəri kimi bu tədbirdə iştirak imkanını yüksək qiymətləndiririk. Bu, insan hüquqlarının vəziyyətinə dair səslərimizin beynəlxalq aləmdə eşidilməsi üçün bir fürsətdir”.
Tədbirdə iştirak edəcək digər demokratik qüvvələr arasında Azərbaycan Xalq Cəbhəsi Partiyasının sədri Əli Kərimlinin də olacağı gözlənilir. Hüquq müdafiəçisi bu görüşün həm müzakirələr, həm də milli həmrəylik baxımından əhəmiyyət daşıdığını vurğulayıb:
“AXCP lideri Əli Kərimli ilə insan hüquqları sahəsində əməkdaşlıq və mövcud hadisələrin müzakirəsi mümkün olacaq. Bu, repressiyaya məruz qalan vətəndaş cəmiyyəti üçün mühüm bir addım, həmçinin insan hüquqları gündəminin formalaşmasında vacib bir nümunədir”.
