Bakı İstintaq Təcridxanasının (BİT) tibb məntəqəsində ixtisaslı həkimlərin çatışmazlığı və rüşvət halları ilə bağlı yeni faktlar üzə çıxıb.

Məlumata görə, təcridxanada tibb personalının əksəriyyəti ya feldşer, ya da terapevtdir. Uzman həkimlərin burada işləmək istəməməsinin əsas səbəbi maaşların aşağı olmasıdır. Hazırda təcridxanada həkimlərin əməkhaqqı 800 manat civarındadır ki, bu da savadlı kadrların sistemdən uzaq durmasına səbəb olur.

Qadın məhbusların sözlərinə görə, illərdir burada çalışan bir həkim ginekoloqla bağlı sualı cavablandırarkən “Savadlı həkimin burada nə işi var? 800 manat maaşa hansı savadlı həkim işləyər?” deyə etiraf edib.

Güney Həsənova ilə bağlı istintaq

Hazırda qadınlar korpusunun həkimi, mayor Güney Həsənova barəsində istintaq araşdırması aparılır. İddialara görə, o, məhbuslardan rüşvət alaraq tibbi xidmət göstərib. Onun fəaliyyəti ilə bağlı bir sıra məhbuslardan ifadələr alınıb.

Əvvəlki məlumatlarda da Güney Həsənovanın rüşvət müqabilində tibbi yardım göstərməsi halları qeyd olunmuşdu. Hazırda o, vəzifəsindən uzaqlaşdırılıb.

Məhbusların sözlərinə görə, təcridxanada həkimlər ya rüşvət yolu ilə dolanmalı, ya da başqa iş axtarmağa məcbur qalırlar. Bu isə məhbusların tibbi xidmətə çıxış hüququnun ciddi şəkildə məhdudlaşdırıldığını göstərir.