Bu ilin avqustunda həbs olunan “Miray” ləqəbli tiktoker Aysel Mustafayeva Sumqayıt polisinin ona qarşı qanunsuz hərəkətlərə yol verdiyini iddia edib. Hazırda Bakı İstintaq Təcridxanasında saxlanılan Mustafayeva bu barədə “Abzas Media”ya ünvanladığı məktubunda danışıb.

“Polislər evimə zorla daxil oldular”

Aysel Mustafayevanın sözlərinə görə, avqustun 27-də evindən zorla çıxarılaraq Sumqayıt Şəhər 4-cü Polis Bölməsinə aparılıb:
“Sumqayıt Şəhər Polis İdarəsinin rəisi Fəqan Azadəliyevin mənə qarşı qanunsuz hərəkətlərini ictimailəşdirdiyimə görə, polis bölməsində mənə 6 qram narkotik ‘yüklədilər’,” – deyə o yazıb.

Onun sözlərinə görə, evinə polis müdaxiləsi zamanı həm Daxili İşlər Nazirliyinin (DİN), həm də Dövlət Təhlükəsizlik Xidmətinin qaynar xətlərinə müraciət etsə də, nəticəsiz qalıb.

“Zənglərimə qadağa qoyuldu, məcburi işlər gördürüldü”

Tiktoker iddia edib ki, polis rəisinin göstərişi ilə bütün telefon zənglərinə qadağa qoyulub, saxlanma yerində isə döşəmələri silməyə məcbur edilib.

O, sentyabrın 15-də Sumqayıt Rayon Məhkəməsində telefon danışıqlarına qoyulan qadağanın götürülməsi üçün vəsatət verdiyini, lakin müstəntiqin materialları təqdim etməməsi səbəbindən prosesin təxirə salındığını bildirib.

“Məni həbsxanada çürüdəcəyini dedi”

Mustafayeva məktubunda sentyabrın 17-də polis rəisi Fəqan Azadəliyevlə görüşdüyünü də qeyd edib:
“11 yaşlı oğlumdan xəbər ala bilmək üçün zəng qadağamın götürülməsini xahiş etdim. Fəqan Azadəliyev cavabında məni həbsxanada çürüdəcəyini, oğlumu isə əlimdən alıb məni analıqdan məhrum edəcəyini dedi”.

Onun sözlərinə görə, həmin gün etiraz əlaməti olaraq özünü yandırmağa cəhd edib.

Əvvəlki şikayətlər

Tiktoker daha əvvəl də oxşar təzyiqlərlə üzləşdiyini iddia edib. O, 2024-cü ilin aprelin 16-da Sumqayıt Şəhər Polis İdarəsinin rəisi Cavidan Məmmədovun üç telefonunu məhkəmə qərarı olmadan müsadirə etdiyini, mayın 3-də isə əsassız olaraq 500 manat cərimələndiyini deyib:
“O zaman etiraz əlaməti olaraq başımı dibindən qırxmışdım. Həmin cəriməni sonradan özləri ödədilər, amma məsələni DİN rəhbərliyinə məişət zorakılığı kimi təqdim etdilər”.

Mustafayeva əlavə edib ki, DİN rəhbərliyinə etdiyi müraciətlər də ünvana çatdırılmayıb.

İttiham və həbs

Avqustun 28-də o, Cinayət Məcəlləsinin 234.1-1-ci maddəsi (narkotik vasitələrin qanunsuz saxlanılması) ilə təqsirləndirilən şəxs qismində saxlanılıb. Sumqayıt Şəhər Məhkəməsi onun barəsində 4 aylıq həbs qətimkan tədbiri seçib.

Rəsmi mövqe yoxdur

Aysel Mustafayevanın ittihamları ilə bağlı Sumqayıt Şəhər Polis İdarəsi ilə əlaqə saxlamağa çalışılsa da, zənglər cavabsız qalıb.

Qeyd edək ki, son aylar Azərbaycanda bir neçə tiktokerin saxlanılması müşahidə olunub. Rəsmi açıqlamalarda səbəb kimi narkotik ittihamları göstərilsə də, DİN onların sosial şəbəkələrdə “cəmiyyətə qarşı hörmətsizlik, mənəvi dəyərlərə uyğun olmayan paylaşımlar” etdiyini əsaslandırır.