Prezident Administrasiyasının sabiq rəhbəri, Azərbaycan elmlər akademiyasının keçmiş prezidenti Ramiz Mehdiyevə qarşı irəli sürülən ağır ittihamlar onun uzun illər yaxın çevrəsində yer almış şəxsləri yenidən gündəmə gətirib.

Onlardan biri də “Baku Steel Company”nin keçmiş rəhbəri Rasim Məmmədovdur. Bir vaxtlar “boz kardinal” kimi tanınan Mehdiyevin ən etibarlı adamlarından hesab olunan iş adamı 2021-ci ildə Dövlət Təhlükəsizliyi Xidməti tərəfindən həbs olunub. O, mənimsəmə, dələduzluq və digər iqtisadi cinayətlərdə ittiham edilərək məhkum edilib və artıq dörd ildir ki, həbsdədir.

Məlumata görə, 2020-ci ilin sonlarında Ramiz Mehdiyevin ailəsi Rasim Məmmədovdan üz döndərib. Mehdiyevin oğlu Teymur Mehdiyev və kürəkəni İlham Əliyev onun barəsində hüquq-mühafizə orqanlarına müraciət edərək, iş adamının onlardan ümumilikdə 7,5 milyon dollar mənimsədiyini bildiriblər.

Sonradan “Baku Steel Company”dən əldə edilən vəsait hesabına inşa olunduğu iddia edilən “Baku Oksford Məktəbi” üzərində Mehdiyevlərin və Məmmədovların mülki çəkişməsi başlayıb. Məhkəmənin qərarına əsasən, bina qanunsuz yolla əldə edilən vəsaitlə inşa edildiyi üçün dövlət nəfinə müsadirə olunub.

Hazırda Ramiz Mehdiyev ev dustaqlığındadır. Ona qarşı dövlətə xəyanət, hakimiyyəti zorla ələ keçirməyə cəhd və cinayət yolu ilə qazanılmış vəsaitlərin leqallaşdırılması ittihamları irəli sürülüb.

Məhz bu sonuncu epizod üzrə Rasim Məmmədovun da şahid qismində dindirilməsi gözlənilir. Onun Mehdiyevlə bağlı hansı məqamları etiraf edəcəyi isə böyük maraq doğurur.

Ramiz Mehdiyev bir vaxtlar belə demişdi:

“Biz hüquqi dövlətdə yaşayırıq, hər kəs törətdiyi əmələ görə cavab verəcək.”

İndi isə bu sözlərin kimlərə şamil olunacağı sual altındadır.