Tarif (qiymət) Şurasının qərarı ilə Azərbaycanda Aİ-92 markalı avtomobil benzininin və dizel yanacağının qiyməti artırılıb.

Qərara əsasən, Aİ-92 markalı benzinin 1 litrinin qiyməti 1 manat 10 qəpikdən 1 manat 15 qəpiyə, dizel yanacağının 1 litrinin qiyməti isə 1 manatdan 1 manat 10 qəpiyə qaldırılıb.

Qiymət artımı qanunvericiliyə edilən dəyişikliklə əlaqələndirilir. Dəyişikliklərə əsasən, avtomobil benzininin, dizelin və maye qazın hər litrinə görə yol vergisi 7 qəpik müəyyən edilib. Bu vəsait 2025-ci ilin sentyabr ayında yaradılan “İctimai nəqliyyat” Məqsədli Büdcə Fonduna yönəldiləcək.

Rəsmi açıqlamalara görə, Fondun yaradılmasında məqsəd iri şəhərlərdə və şəhərətrafı ərazilərdə artan əhali fonunda nəqliyyat sisteminin dayanıqlılığını təmin etmək, sərnişin daşımalarında xidmət keyfiyyətini və təhlükəsizliyi yüksəltməkdir. Toplanan vəsaitlər ictimai nəqliyyat xidmətlərinin əlçatanlığının artırılmasına, yol hərəkəti təhlükəsizliyinin təmin olunmasına və nəqliyyat infrastrukturunun inkişafına yönəldiləcək.

Tarif Şurası bildirir ki, qiymət dəyişikliyindən sonra da Aİ-92 markalı benzin və dizel yanacağının pərakəndə satış qiymətləri bir çox ölkələrlə müqayisədə yüksək hesab olunmur.

Qeyd edək ki, yanacaq qiymətlərindəki artım ictimaiyyət arasında geniş müzakirələrə səbəb olub və bu qərarın nəqliyyat xərclərinə, eləcə də ümumi qiymət artımına təsiri diqqət mərkəzindədir.