Ötən gün səhər saatlarında İspaniyanın paytaxtı Madrid yaxınlığında yerləşən elit yaşayış məntəqələrindən birində silahlı insident baş verib. Reuters agentliyinin məlumatına görə, sabiq ukraynalı siyasətçi, prezident Viktor Yanukoviçin keçmiş müşaviri və onun administrasiyasının rəhbəri Andriy Portnov naməlum şəxslər tərəfindən güllələnib.

Hücum səhər saat 09:15 radələrində Portnovun övladlarını Madridin Amerika məktəbinə gətirdiyi zaman baş verib. Silahlılar onu baş və kürək nahiyəsindən atəşə tutub, daha sonra isə yaxınlıqdakı meşəlik əraziyə qaçaraq izlərini itiriblər.

İspaniya polisi hadisə faktını təsdiqləsə də, ilkin olaraq mərhumun adını açıqlamayıb. Lakin yerli mətbuatın Daxili İşlər Nazirliyindəki mənbələrə istinadla yaydığı məlumata görə, qətlə yetirilən şəxs həqiqətən də Andriy Portnovdur.

Portnov Ukraynadakı fəaliyyətində Rusiyaya yaxın mövqeyi və 2014-cü il Avromaydan etirazları zamanı iştirakçılara qarşı yönəlmiş qanunvericiliyin hazırlanmasında iştirakı ilə tanınırdı. Yanukoviç rejiminin devrilməsindən sonra o, əvvəlcə Rusiyaya, oradan isə Avstriyaya köç etmişdi. Onun İspaniyaya nə vaxt və hansı məqsədlə gəldiyi isə hələlik məlum deyil.

Hazırda İspaniya hüquq-mühafizə orqanları cinayətkarların axtarışını davam etdirir və istintaq siyasi motivli qətl versiyasını da araşdırır. Hadisə geniş ictimai rezonans doğurub.