Bu gün saat 15:00 radələrində Ələt-Astara magistralının 186-cı kilometrliyində, Biləsuvar rayonu ərazisində ciddi yol-nəqliyyat hadisəsi baş verib.

Foto.info.az xəbər verir ki, əks istiqamətlərdə hərəkət edən “Ford” markalı yük avtomobili ilə “Opel” markalı minik avtomobili toqquşub. Qəza nəticəsində hər iki nəqliyyat vasitəsində olan 5 nəfər müxtəlif dərəcəli bədən xəsarətləri alıb.

Hadisə yerinə dərhal təcili tibbi yardım briqadaları cəlb olunub. Yaralılar Biləsuvar Rayon Mərkəzi Xəstəxanasına çatdırılıb. TƏBİB-dən verilən məlumata görə, xəsarət alanlardan iki kişi və bir qadın bədənin müxtəlif nahiyələrinin çoxsaylı travması diaqnozu ilə xəstəxanaya hospitalizasiya olunub. Yaralılardan ikisinin vəziyyətinin xüsusilə ağır olduğu bildirilir. Digərlərinin vəziyyəti stabil qiymətləndirilir.

Hazırda qəzaya səbəb olan amillərin müəyyən edilməsi istiqamətində araşdırmalar aparılır.