Bakıda həyat yoldaşını öldürməyə cəhd etməkdə ittiham olunan “Referans” klinikasının Mərdəkan filialının direktoru Vasif Kərimov barəsində həbs qətimkan tədbiri seçilib.

İstintaq orqanının təqdimatına Yasamal Rayon Məhkəməsində baxılıb və qərarla Vasif Kərimovun 4 ay müddətinə həbs olunmasına qərar verilib.

Hadisə iyulun 16-da, saat 13:00 radələrində Yasamal rayonu, Məhəmməd Xiyabani küçəsi 133/135 ünvanında yerləşən çoxmərtəbəli binanın qarajında baş verib. Araşdırmalar zamanı məlum olub ki, 1986-cı il təvəllüdlü Vasif Kərimov, ailə münaqişəsi zəminində 1987-ci il təvəllüdlü həyat yoldaşı Fərqanə Kərimovaya bıçaqla xəsarət yetirib, daha sonra isə silahla qarın nahiyəsindən güllələyib.

Məlumata görə, hadisəyə səbəb Kərimovun başqa qadınla qeyri-rəsmi münasibətdə olması və Fərqanə Kərimovanın bundan xəbər tutaraq qarşı tərəfə irad bildirməsi olub. Mübahisədən narazı qalan Vasif Kərimov, həyat yoldaşını qarajda gözləyib və hadisəni burada törədib.

Yaralı qadın Kliniki Tibbi Mərkəzə yerləşdirilib, cərrahi əməliyyat olunub və hazırda müalicəsi davam etdirilir. Cütlüyün üç övladı var.

Faktla bağlı Yasamal Rayon Prokurorluğunda Cinayət Məcəlləsinin 29, 120.1-ci (qəsdən adam öldürməyə cəhd) maddəsi ilə cinayət işi başlanıb. Vasif Kərimov şübhəli şəxs qismində saxlanılıb.