Bu gün İkinci Qarabağ müharibəsi dövründə Gəncə şəhərinin Ermənistan silahlı qüvvələri tərəfindən ilk dəfə raket hücumuna məruz qalmasından 5 il ötür.

2020-ci il oktyabrın 4-də, səhər saat 10 radələrində Ermənistan ordusunun atdığı raketlər Azərbaycanın ikinci ən böyük şəhəri olan Gəncədə mülki yaşayış məntəqələrinə, o cümlədən sakinlərin yaşadığı ikimərtəbəli binaya və fərdi evlərə düşüb.

Hücum nəticəsində 1 mülki şəxs — Əliyev Tunar Qoşqar oğlu şəhid olub, 32 nəfər yaralanıb. Eyni zamanda, şəhərdəki bir sıra yaşayış evlərinə, mülki infrastruktura və tarixi tikililərə ciddi ziyan dəyib.

Bu hücum, Ermənistanın müharibə zonasından — Qarabağdan kənara yönəltdiyi ilk ciddi raket zərbəsi kimi yadda qalıb.

Hadisədən sonra Azərbaycanın Baş prokuroru Kamran Əliyev bəyanat yayıb. Bəyanatda qeyd olunub ki, ilkin istintaq nəticəsində qondarma “Dağlıq Qarabağ Respublikasının prezidenti” Arayik Arutunyanın dinc əhalini hədəf almaqla Cenevrə konvensiyasını pozduğu müəyyən edilib.

Bəyanatda bildirilir:

“Arayik Arutunyanın barəsində Azərbaycan Cinayət Məcəlləsinin 100.1, 100.2, 116-cı, 117.2, 120.2, 186.3, 214.2, 218.3 və 279.3-cü maddələri ilə cinayət işi başlanılıb və istintaq Baş Prokurorluğun İstintaq İdarəsinə tapşırılıb.”

Qeyd edək ki, İkinci Qarabağ müharibəsi zamanı Ermənistan Silahlı Qüvvələri Gəncəyə ümumilikdə 5 dəfə — 4, 5, 8, 11 və 17 oktyabr 2020-ci il tarixlərində raket və ağır artilleriya zərbələri endirib.

Nəticədə 26 mülki şəxs şəhid olub, 175 nəfər yaralanıb, şəhərdəki mülki obyektlərə, avtomobillərə və infrastruktur obyektlərinə böyük zərər dəyib.

Ümumilikdə, müharibə dövründə Ermənistanın hücumları nəticəsində 12-si uşaq, 27-si qadın olmaqla 93 mülki şəxs həlak olub, 454 nəfər yaralanıb, 12 292 yaşayış və qeyri-yaşayış sahəsinə, 288 nəqliyyat vasitəsinə və 1 018 fermer təsərrüfatına ziyan dəyib.