İlin sonuna qədər ölkəmizdə iki Super Ay təbiət hadisəsi müşahidə ediləcək. Bu barədə Bakı Dövlət Universitetinin (BDU) Fizika fakültəsinin Astrofizika kafedrasından məlumat verilib.

Bildirilir ki, Super Ay hadisəsi noyabrın 5-də və dekabrın 4-də baş verəcək.

Super Ay — Ayın Tam (dolu) fazasının, onun Yerə ən yaxın nöqtəsi olan perigeydə olduğu vaxta təsadüf etməsidir. Ay Yerə 360 min kilometrdən daha yaxın olduqda, Tam Ay adi görünüşdən 7–14% böyük, 15–30% daha parlaq olur.

Məlumata görə:
• Noyabrın 5-də Ayın Yerə olan məsafəsi — 356 832 km,
• Dekabrın 4-də isə — 356 961 km olacaq.

Bu zaman Ay adi tam Aydan təxminən 8% böyük və 16% daha parlaq görünəcək.

Tarixi müqayisələrə görə, Ayın Yerə ən çox yaxınlaşması 1912-ci il yanvarın 4-də qeydə alınıb — məsafə 356 375 km olub. Növbəti ən yaxın Super Ay 2034-cü il noyabrın 25-də müşahidə olunacaq (356 447 km).

Uzmanlar bildirirlər ki, Super Ay insanlar üçün təhlükəsizdir. Sadəcə Ayın cazibə qüvvəsi dəniz və okean səviyyəsində 3–5 sm civarında kiçik artıma səbəb ola bilər.

Havalar aydın olarsa, hər iki Super Ayı adi gözlə müşahidə etmək mümkün olacaq.