Yanvarın 6-da Dövlət Sərhəd Xidmətinin (DSX) 2025-ci ilin xidməti-döyüş fəaliyyətinin yekunlarına dair hesabat müşavirəsi keçirilib. Bu barədə DSX-nin Mətbuat Mərkəzi məlumat yayıb.

Müşavirə Dövlət Himninin səsləndirilməsi ilə başlayıb, Ümummilli Lider Heydər Əliyevin və Vətən uğrunda həlak olmuş şəhidlərin xatirəsi bir dəqiqəlik sükutla yad edilib.

Tədbirdə DSX-nin rəisi, general-polkovnik Elçin Quliyev bildirib ki, Prezident, Silahlı Qüvvələrin Müzəffər Ali Baş Komandanı İlham Əliyevin rəhbərliyi altında 2025-ci il dövlətçilik tariximiz üçün xüsusi əhəmiyyət daşıyıb və Dövlət Sərhəd Xidməti qarşısında qoyulan tapşırıqlar yüksək səviyyədə icra olunub.

Hesabat müşavirəsində hərbi birləşmə rəhbərlərinin məruzələri dinlənilib, struktur qurumların xidməti fəaliyyəti qiymətləndirilib.

Qeyd olunub ki, 2025-ci il ərzində:
• Dövlət sərhədini pozduqlarına görə 516 nəfər,
• Sərhəd rejimini pozduqlarına görə 1226 nəfər,
• Axtarışda olan 3922 nəfər,
• Saxta sənədlərlə 108, özgəsinə məxsus sənədlə 8,
• Buraxılış məntəqələrindən gizli keçməyə cəhd göstərən 6 nəfər saxlanılıb.

Terrorçuluğa qarşı mübarizə çərçivəsində xaricdə döyüşmüş 6 nəfər tutulub. Eyni zamanda:
• Narkotiklərin qanunsuz dövriyyəsi ilə məşğul olan 18,
• Qaçaqmalçılıqla 8,
• Qeyri-qanuni miqrasiya ilə 12 mütəşəkkil cinayətkar dəstə zərərsizləşdirilib.

DSX və digər hüquq-mühafizə orqanları ilə birgə həyata keçirilən tədbirlər nəticəsində:
• 4 ton 311 kq 864 qram narkotik vasitə,
• 78 457 ədəd psixotrop və güclü təsiredici həb,
• 128 milyon 255 min 862 manat dəyərində qaçaqmalın sərhəddən keçirilməsinin qarşısı alınıb,
• 24 ton 585 kq narkotik xassəli bitki məhv edilib.

Müşavirədə 2026-cı il üçün əsas vəzifələr də müəyyənləşdirilib. Bildirilib ki, dövlət sərhədinin mühafizəsinin texniki vasitələrlə gücləndirilməsi, çətin relyefli ərazilərdə və istənilən hava şəraitində xidmətin təşkili, şəxsi heyətin döyüş hazırlığının yüksək səviyyədə saxlanılması, hərbi intizamın möhkəmləndirilməsi və sərhədçilərin sağlamlığının qorunması əsas prioritetlər olacaq.

Vurğulanıb ki, DSX şəxsi heyəti Prezident İlham Əliyevin tapşırıqlarını bundan sonra da böyük məsuliyyət və qürur hissi ilə icra etməyə hazırdır.