7 yanvar 2026-cı il tarixində Qazax rayonunun Xanlıqlar kəndi ərazisində “SOCAR PETROLEUM” QSC-yə məxsus 7 saylı neft bazası sahəsində yanacaq daşıyan avtomobildə partlayış baş verib.

Partlayış doldurma prosesi zamanı qeydə alınıb və dərhal Fövqəladə Hallar Nazirliyinə (FHN) məlumat verilib. Hadisə yerinə Qazax Rayon Yanğından Mühafizə Hissəsinin qüvvələri cəlb olunub. Yanğınsöndürənlərin zəruri və təxirəsalınmaz tədbirləri sayəsində yanğın qısa müddətdə məhdudlaşdırılıb və tam söndürülüb, ətraf əraziyə yayılmasının qarşısı alınıb.

Hadisə nəticəsində Qazax şəhər sakini, 1994-cü il təvəllüdlü Şəmil İbrahimov, neft bazasında süzücü-doldurucu vəzifəsində çalışarkən yanaraq ölüb.

Bundan əlavə, yanğın zamanı 1 nəfər (kişi) xəsarət alıb və Qazax Rayon Mərkəzi Xəstəxanasının Təcili tibbi yardım şöbəsinə yerləşdirilib. Yaralının hər iki əlində 2-ci dərəcəli termiki yanıq diaqnozu qoyulub. Hazırda müalicəsi davam etdirilir, vəziyyəti orta stabil qiymətləndirilir.

Faktla bağlı Qazax rayon prokurorluğunda araşdırma aparılır və yanğının başvermə səbəbləri öyrənilir.

Hadisə yerində FHN əməkdaşları tərəfindən təhlükəsizlik tədbirləri gücləndirilib və ərazidə yanğının tam söndürülməsi istiqamətində işlər davam etdirilir.