Bərdə Rayon Polis Şöbəsinin əməkdaşları tərəfindən keçirilən əməliyyat-axtarış tədbirləri nəticəsində qanunsuz odlu silahların əldə edilməsi və satışı ilə məşğul olan iki nəfər saxlanılıb.

DİN-in Mətbuat Xidmətinin regional qrupundan verilən məlumata görə, araşdırmalar zamanı Ağcabədi rayon sakini, 25 yaşlı Sahil Kərimzadə və onunla qabaqcadan əlbir olan 27 yaşlı həmyerlisi İntiqam Rüstəmovun qanunsuz silah alveri ilə məşğul olduqları müəyyən edilib.

Əməliyyat zamanı S.Kərimzadə Bərdə rayonu ərazisində idarə etdiyi avtomobillə hərəkətdə olarkən polis əməkdaşları tərəfindən saxlanılıb. Avtomobilə baxış zamanı yük yerindən pul müqabilində satmaq məqsədilə gətirilmiş 2 ədəd “Kalaşnikov” markalı avtomat, 2 patron darağı və 60 ədəd patron aşkar edilərək götürülüb.

Tədbirlərin davamı olaraq odlu silah-sursatı qanunsuz əldə edib saxlayan İntiqam Rüstəmov Xocavənd rayonu ərazisində saxlanılaraq Bərdə Rayon Polis Şöbəsinə gətirilib.

Ümumilikdə saxlanılan şəxslərdən 4 ədəd “Kalaşnikov” avtomatı, 4 patron darağı və 60 ədəd patron götürülüb.

Faktla bağlı Cinayət Məcəlləsinin müvafiq maddələri ilə cinayət işi başlanılıb, istintaq tədbirləri davam etdirilir.