“SOCAR-AQŞ” MMC-nin sabiq baş direktoru Ramin İsayev külli miqdarda yeyinti və vəzifə cinayətlərində təqsirli bilinərək 14 il müddətinə azadlıqdan məhrum edilib. Bakı Ağır Cinayətlər Məhkəməsində bir ildən artıq davam edən araşdırma 8 sentyabrda hökmün elan olunması ilə yekunlaşıb.

Məhkəmə R.İsayevin Cinayət Məcəlləsinin 179.4 (xüsusilə külli miqdarda mənimsəmə), 193-1.3.2 (cinayət yolu ilə əldə olunmuş əmlakın leqallaşdırılması), 308.2 (vəzifə səlahiyyətlərindən sui-istifadə, ağır nəticələr doğurduqda) və 313 (vəzifə saxtakarlığı) maddələri ilə təqsirli olduğuna qərar verib.

Hökmə əsasən, İsayevin yaxınlarının adına rəsmiləşdirilmiş daşınmaz əmlak və ondan götürülən milyonlarla dollar nağd pul müsadirə olunub və zərərçəkmiş qurumların – “SOCAR-AQŞ”, “Abşeron Qazma” MMC və “Aqrarkredit” QSC – mülki iddialarının ödənilməsinə yönəldiləcək. Müsadirə olunan əmlaklar sırasında “Sea Breeze”də ev, Bakının mərkəzində mənzillər və digər obyektlər də var.

İttihama görə, R.İsayev uzun müddət qohum və tanışlarını formal işə götürərək onlara yüksək maaşlar yazıb, onların adına şirkətlər yaradıb tenderlərdə qalib elan etməklə milyonlarla dövlət vəsaitini mənimsəyib. Bundan başqa, Türkiyə vətəndaşlığı alaraq həmin pulların bir hissəsini daşınmaz əmlaka və bank hesablarına yönləndirdiyi iddia edilir.

İttiham materiallarında o, vəzifədən çıxarıldıqdan sonra şirkətin hesablarına kiberhücumlar təşkil etməkdə və Beynəlxalq Bankdan götürülən milyonlarla manatlıq kreditlərin yeyintisində də suçlanır. R.İsayev isə özünü təqsirli saymadığını, dövlət məmuru olmazdan öncəki biznes fəaliyyətindən kifayət qədər gəlirləri olduğunu bildirir.

2007-ci ildə SOCAR, “Nobel Energy” və “Abşeron Qazma” MMC-nin təsisçiliyi ilə yaradılan “SOCAR-AQŞ”da Ramin İsayev 2009–2020-ci illərdə baş direktor vəzifəsində çalışıb. O, daha sonra Türkiyəyə köçərək Ramin Hakan adı ilə vətəndaşlıq alıb.