Ermənistanın İstintaq Komitəsi bildirib ki, aprel ayından iyunun 7-si saat 15:00-dək seçkilərlə əlaqədar ehtimal olunan qanun pozuntuları üzrə 117 cinayət işi başlanıb.

Qurumun məlumatına görə, bu işlər çərçivəsində 86 nəfər barəsində cinayət təqibi başladılıb.

Ən çox cinayət işi seçki təşviqatına məcburetmə və ya təşviqatın aparılmasına mane olma faktları üzrə açılıb. Bu kateqoriya üzrə 45 iş qeydə alınıb. Bundan başqa, toplantıların keçirilməsinə və ya onlarda iştiraka mane olma, eləcə də toplantılarda iştiraka görə maddi stimullaşdırma ilə bağlı 41 cinayət işi başlanıb.

İstintaq Komitəsi seçki hüquqlarının həyata keçirilməsinə mane olma faktları üzrə 8, təkrar səsvermə və ya başqasının əvəzinə səsvermə halları üzrə 6, səsvermənin gizliliyinin pozulması ilə bağlı isə daha 6 cinayət işinin araşdırıldığını açıqlayıb.

Bundan əlavə, vəzifəli şəxs statusunun əldə edilməsinə və ya saxlanmasına mane olan məlumatların gizlədilməsi ilə bağlı 9, seçki rüşvətinin alınması və verilməsi üzrə 1, seçki dövründə xeyriyyəçilik qadağasının pozulması ilə bağlı isə 1 cinayət işi açılıb.

Məlumata görə, artıq 16 nəfər barəsində 9 cinayət işi üzrə ittiham aktı məhkəməyə göndərilib.

Araşdırmalar çərçivəsində təxminən 1200 nəfər dindirilib, 280-ə yaxın axtarış aparılıb.

Ermənistan parlamentinə seçkilər iyunun 7-də saat 08:00-dan 20:00-dək keçirilib. Seçkilərdə 16 partiya və 2 blok olmaqla ümumilikdə 18 siyasi qüvvə iştirak edib. Səsvermə hüququna malik vətəndaşların sayı 2 milyon 505 min 102 nəfərdir.

Seçki prosesini 13 yerli və 8 beynəlxalq müşahidə missiyası, həmçinin diplomatik nümayəndəliklərin və xarici seçki qurumlarının təmsilçiləri izləyiblər. Ölkə üzrə 1758 seçki məntəqəsində videomüşahidə kameraları quraşdırılıb, seçicilərin elektron qeydiyyatı üçün isə 4 min texniki avadanlıqdan istifadə olunub.