Neftçala rayonunda Xəzər dənizinin balıq ehtiyatlarının artırılması məqsədilə növbəti bioloji bərpa tədbiri keçirilib.

Kür çayının Xəzər dənizi ilə qovuşduğu ərazidə 50 min ədəd nərəkimilər fəsiləsinə aid balıq körpəsi təbii su hövzəsinə buraxılıb.

Məlumata görə, yaxın günlərdə daha 150 min ədəd balıq körpəsinin təbii mühitə buraxılması nəzərdə tutulur.

Ümumilikdə 2026-cı il ərzində Azərbaycanın su hövzələrində balıq ehtiyatlarının artırılması və biomüxtəlifliyin qorunması məqsədilə 500 min ədəd nərə cinsli balıq körpəsinin təbii mühitə buraxılması planlaşdırılır.

Proqram çərçivəsində 200 min ədəd balığın dövlət-özəl tərəfdaşlığı hesabına, 300 min ədəd balığın isə dövlətə məxsus “Xıllı Balıq” MMC tərəfindən su hövzələrinə buraxılması nəzərdə tutulur.

Qeyd edək ki, nərə cinsli balıqlar Xəzər ekosisteminin ən qiymətli canlılarından hesab olunur. Bu növlərin sayının azalması səbəbindən onların artırılması və təbii ehtiyatların bərpası istiqamətində müxtəlif layihələr həyata keçirilir.

22 May – Beynəlxalq Bioloji Müxtəliflik Günü münasibətilə Neftçalada 2 min ədəd nərə balığı körpəsinin Xəzərə buraxılması ilə bu ilki tədbirlərə start verilmişdi.

Həyata keçirilən aksiyaların əsas məqsədi nəsli təhlükə altında olan nərə cinsli balıqların populyasiyasının bərpasına, ekoloji tarazlığın qorunmasına və Azərbaycanın su hövzələrində biomüxtəlifliyin zənginləşdirilməsinə töhfə verməkdir.