Bakıda 11 il əvvəl baş vermiş ağır cinayət işi üzrə məhkəmə prosesi başa çatıb.

Bakı Ağır Cinayətlər Məhkəməsində keçirilən prosesdə Hüseyn Cəfərov barəsində hökm elan olunub.

Hakim Firdovsi Əliyevin sədrliyi ilə keçirilən məhkəmə iclasında təqsirləndirilən şəxs 10 il müddətinə azadlıqdan məhrum edilib.

Qeyd edək ki, əvvəlki prosesdə dövlət ittihamçısı Rauf Malışov çıxış edərək Hüseyn Cəfərova 11 il həbs cəzası verilməsini istəyib.

İstintaq materiallarına əsasən, hadisə 19 noyabr 2014-cü ildə baş verib. Hüseyn Cəfərov dostu Özal Orduxanlı ilə birlikdə maddi qazanc əldə etmək məqsədilə Əhməd Əhmədovun evindən telefon və elektron avadanlıqlar oğurlamaq barədə razılığa gəlib.

Onlar axşam saatlarında evin qarşısına gələrək hasarın üzərindəki çadırı kənara çəkib həyətə daxil olublar. Evdə heç kimin olmadığını düşündükdən sonra qaraja girərək axtarış aparıblar.

Lakin oğurlamaq üçün yararlı əşya tapa bilməyən şəxslər ərazidən uzaqlaşmaq istəyərkən səs eşidilib və ifşa olunmaq qorxusu ilə qaçmağa başlayıblar.

Hadisə zamanı qonşuluqda yaşayan Namiq Hənifəyev qaçan şəxslərdən biri olan Özal Orduxanlının arxasınca gedib.

Daha sonra Hüseyn Cəfərov Namiq Hənifəyevlə qarşılaşıb və ona bıçaqla zərbələr endirib.

Ağır xəsarətlər alan Namiq Hənifəyev xəstəxanaya çatdırılsa da, onun həyatını xilas etmək mümkün olmayıb.

Hüseyn Cəfərova Cinayət Məcəlləsinin 126.3-cü maddəsi ilə — qəsdən sağlamlığa ağır zərər vurma nəticəsində zərərçəkmiş şəxsin ölümünə səbəb olmaq ittihamı irəli sürülüb.