Bakı Ağır Cinayətlər Məhkəməsində xüsusilə külli miqdarda dələduzluqda təqsirləndirilən polkovnik Rasim İldırımzadə, Dünya Azərbaycanlıları İctimai Maarif Mərkəzinin rəhbəri və “Bakutime.az” saytının təsisçisi Zaur Mirzəzadə, eləcə də Balakən dairə seçki komissiyasının sabiq sədri Qoşqar Məmmədovun cinayət işi üzrə məhkəmə prosesi başa çatıb.

Məhkəmənin hakimi Fəxri Məmmədovun sədrliyi ilə keçirilən son iclasda dövlət ittihamçısı çıxış edərək təqsirləndirilən şəxslərin hər birinin 12 il müddətinə azadlıqdan məhrum edilməsini, həmçinin barələrində həbs qətimkan tədbirinin seçilərək məhkəmə zalında həbs olunmalarını istəyib.

Müdafiə tərəfinin çıxışından və təqsirləndirilən şəxslərin son sözündən sonra məhkəmə hökm elan edib.

Hökmə əsasən, Rasim İldırımzadə 9 il 9 ay, Zaur Mirzəzadə 10 il 6 ay, Qoşqar Məmmədov isə 10 il müddətinə azadlıqdan məhrum ediliblər. Onlar məhkəmə zalında həbs olunublar.

İttihama görə, təqsirləndirilən şəxslər əlbir olaraq xüsusilə külli miqdarda dələduzluq törətməkdə ittiham ediliblər. Onların barəsində Azərbaycan Respublikası Cinayət Məcəlləsinin 178.4-cü maddəsi (xüsusilə külli miqdarda dələduzluq) ilə cinayət işi başlanıb.

Qeyd edək ki, Zaur Mirzəzadə daha əvvəl də dələduzluq ittihamı ilə məhkəmə qarşısına çıxarılıb. O, bir qrup şəxslə birlikdə Cinayət Məcəlləsinin 178.3.2-ci maddəsi ilə ittiham olunub. Həmin iş üzrə əvvəlcə ona bəraət verilsə də, dövlət ittihamçısının protestindən sonra Bakı Apellyasiya Məhkəməsi qərarı dəyişərək onu 5 il müddətinə azadlıqdan məhrum edib və məhkəmə zalında həbs edib.

Daha sonra Ali Məhkəmənin qərarı ilə iş yenidən baxılması üçün apellyasiya instansiyasına göndərilib. Bakı Apellyasiya Məhkəməsi isə yekunda Zaur Mirzəzadəyə bəraət verib və o, məhkəmə zalından azad olunub.