Sülh və insanlıq əleyhinə cinayətlər, müharibə cinayətləri, terrorçuluq və digər ağır maddələrlə təqsirləndirilən Ermənistan vətəndaşı Ruben Vardanyanın cinayət işi üzrə məhkəmə prosesi fevralın 10-da davam etdirilib.

Bakı Hərbi Məhkəməsində hakim Zeynal Ağayevin sədrliyi ilə, hakimlər Anar Rzayev və Camal Ramazanovdan ibarət tərkibdə (ehtiyat hakim Günel Səmədova) keçirilən açıq iclasda təqsirləndirilən şəxs rus dilində tərcüməçi və dövlət hesabına vəkillə təmin olunub.

Sədrlik edən hakim bildirib ki, əvvəlki iclasda dövlət ittihamçıları çıxış ediblər və növbəti söz zərərçəkmiş tərəfə verilir.

Azərbaycan dövləti adından zərərçəkmiş qismində Nazirlər Kabineti Aparatının rəhbəri Rüfət Məmmədov çıxış edərək ittiham aktında göstərilən fakt və sübutlarla razı olduğunu deyib və məhkəmədən bunun nəzərə alınmasını xahiş edib.

Zərərçəkmiş şəxslərin hüquqi varisləri Azad Kərimov, Oqtay Şıxəliyev, Qədim Ağaxanov, Faiq Rüstəmov və Şiraslan Həsənov çıxış edərək təqsirləndirilən şəxsin ömürlük azadlıqdan məhrum edilməsini istəyiblər.

Məhkəmə iclası zamanı R.Vardanyan müdafiəçisi Emil Babışovla danışmaq üçün vəsatət qaldırıb və vəsatət təmin olunub. Fasilədən sonra təqsirləndirilən şəxs vəkilinin çıxış etməsini istəmədiyini bildirib.

Müdafiəçi Emil Babışov elan olunmuş ittihamla razı olmadıqlarını qeyd edib və təqsirləndirilən şəxsin mövqeyini əsas götürərək müdafiə nitqi ilə çıxış etməkdən imtina etdiyini açıqlayıb.

Baş prokurorun böyük köməkçisi Vüsal Əliyev müdafiə tərəfinin arqument təqdim etmədiyini nəzərə alaraq əlavə fikir bildirmədiklərini deyib.

Son söz üçün R.Vardanyana söz verilib. O, konkret ittihamlar üzrə deyil, ümumi fikirlər səsləndirib, Azərbaycan Respublikasının Cinayət Məcəlləsini oxuduğunu bildirib. Həmçinin saxlanıldığı müddətdə Azərbaycan poeziyasını kəşf etdiyini deyərək Məhəmməd Füzulinin şeirindən və Hüseyn Cavidin poemasından parçaları rus dilində səsləndirib.

Sədrlik edən tərəflərdən yekun məhkəmə qərarının layihəsini təqdim edib-etməyəcəklərini soruşub. Hər iki tərəf belə bir layihə təqdim etməyəcəyini bildirib.

Bununla da məhkəmə baxışı başa çatmış elan olunub. Məhkəmə heyəti müşavirədən qayıtdıqdan sonra hökm elan ediləcək.

Qeyd edək ki, dövlət ittihamçısı əvvəlki iclasda R.Vardanyanın ömürlük azadlıqdan məhrum edilməsini təklif edib. Təqsirləndirilən şəxs Azərbaycan Respublikası Cinayət Məcəlləsinin çoxsaylı maddələri, o cümlədən təcavüzkar müharibə aparma, insanlıq əleyhinə cinayətlər, terrorçuluq, qəsdən adam öldürmə və digər ağır cinayətlər üzrə ittiham olunur.