Ermənistanın ikinci prezidenti Robert Köçəryan xəstəxanadan çıxarılaraq cəzaçəkmə müəssisəsinə köçürülüb.

Köçəryanın vəkilinin verdiyi məlumata görə, sabiq prezident “Qriqor Lusavoriç” xəstəxanasından çıxarılıb və “Yerevan-Kentron” cəzaçəkmə müəssisəsinə yerləşdirilib.

Bundan əvvəl Korrupsiyaya Qarşı Mübarizə Məhkəməsi Robert Köçəryan barəsində iki aylıq həbs qətimkan tədbiri seçib.

Korrupsiyaya Qarşı Mübarizə Komitəsinin sözçüsü Marina Ohancanyanın açıqlamasına görə, hakim Sarqis Dadoyanın sədrliyi ilə keçirilən prosesdə istintaq orqanının Köçəryanın həbsi barədə vəsatəti tam təmin edilib.

Məhkəmə prosesi uzun saatlar davam edib. İclas zamanı Köçəryanın səhhətinin pisləşdiyi və həkimlərin göstərişi ilə xəstəxanaya aparıldığı bildirilir. Onun oğlu Levon Köçəryan jurnalistlərə açıqlamasında həkimlərin keçmiş prezidentin məhkəmə zalında deyil, xəstəxanada qalmasını məqsədəuyğun hesab etdiklərini söyləyib.

Buna baxmayaraq, məhkəmə prosesi Köçəryanın vəkillərinin iştirakı ilə davam etdirilib və nəticədə onun həbsinə qərar verilib.

Robert Köçəryana qarşı vəzifə səlahiyyətlərindən sui-istifadə, xüsusilə külli miqdarda çirkli pulların yuyulması və xüsusilə külli miqdarda rüşvət alma ilə bağlı ittihamların irəli sürüldüyü bildirilir.

Köçəryan avqustun 25-də korrupsiya işi çərçivəsində saxlanılmışdı. Həmin iş üzrə onun böyük oğlu Sedrak Köçəryan da daxil olmaqla bir neçə şəxs saxlanılıb.

Robert Köçəryan 1998–2008-ci illərdə Ermənistan prezidenti olub. O, hazırda Ermənistanın baş naziri Nikol Paşinyan hakimiyyətinin əsas siyasi rəqiblərindən biri hesab olunur.

Köçəryan və tərəfdarları cinayət təqibini siyasi motivli hesab edir, Ermənistan hakimiyyəti isə araşdırmanın korrupsiya faktları ilə bağlı aparıldığını bildirir.