Dövlət İmtahan Mərkəzi (DİM) 2024-cü ili cəmi 388 min manat xalis mənfəətlə başa vurub. Bu göstərici 2023-cü illə müqayisədə təxminən 10 dəfə azalma deməkdir. Müvafiq məlumat qurumun maliyyə hesabatında əksini tapıb.

Hesabata əsasən, ötən il DİM-in ümumi əməliyyat gəlirləri 41,073 milyon manat təşkil edib ki, bu da əvvəlki illə müqayisədə 5,4% artım deməkdir. Bununla yanaşı, investisiya gəlirləri 141 min manata yüksələrək 4,3 dəfə artıb.

Bununla belə, xərclərdə müşahidə olunan ciddi artım Mərkəzin mənfəətinə mənfi təsir göstərib. İşçi heyəti üzrə xərclər 25,284 milyon manata çataraq 18,3%, amortizasiya xərcləri isə 3,671 milyon manatla 27,5% artıb. Xüsusilə icarə xərcləri 3 dəfə artaraq 874 min manata, təmir və texniki qulluq xərcləri isə 22,6% artaraq 630 min manata yüksəlib.

Digər tərəfdən, bəzi istiqamətlərdə azalma qeydə alınıb. Mühafizə xərcləri 32,9%, mal-material xərcləri 27,45%, ezamiyyə xərcləri isə 5,4% azalıb. Bununla belə, mənfəət vergisi ödənişləri 36,4%, digər vergi ödəmələri isə 42,9% artıb ki, bu da xalis mənfəətin aşağı düşməsinə əlavə təsir göstərib.

2025-ci il yanvarın 1-nə olan məlumata əsasən, DİM-in ümumi aktivləri 47,735 milyon manat olub — bu, illik müqayisədə 1,1% artım deməkdir. Qurumun öhdəlikləri isə 4,1% azalaraq 1,89 milyon manata enib. Balans kapitalı isə 1,3% artaraq 45,845 milyon manata çatıb.

Qeyd edək ki, Dövlət İmtahan Mərkəzi ölkə Prezidentinin 11 aprel 2016-cı il tarixli fərmanı ilə yaradılıb. Nizamnamə kapitalı 1 milyon manat olan Mərkəz dövlət qulluğu üzrə kadrların seçilməsi, ali və orta ixtisas təhsili müəssisələrinə qəbul imtahanlarının təşkili və digər imtahan xidmətlərini həyata keçirən publik hüquqi şəxsdir.