Azərbaycanda gələn ildən Aİ-95 markalı avtomobil benzininin istehsalının dayandırılacağı bildirilir.

2024-cü ilin iyul ayında “Avro-5” keyfiyyət göstəricilərinə uyğun Aİ-95 markalı benzinin istehsalına başlanılmışdı. Bunun nəticəsində həmin il 15 iyul tarixində Aİ-95-in 1 litri 40 qəpik ucuzlaşaraq 1 manat 60 qəpik olmuşdu. Həmin vaxta qədər bu yanacaq növü Azərbaycana yalnız xarici ölkələrdən idxal edilirdi və qiymət daha yüksək idi.

Son məlumatlara əsasən, növbəti il Aİ-95 markalı benzinin daxili istehsalı planlaşdırılmır. Bu addımın səbəbləri barədə hələlik rəsmi açıqlama verilməyib.

Mövzu ilə bağlı iqtisadçı Eldəniz Əmirov bildirib ki, əgər Aİ-95 yalnız xaricdən idxal olunacaqsa, qiymət neftin dünya bazarındakı dəyərindən asılı olacaq:

“Neftin qiymətində artım olsa, Aİ-95 benzininin qiyməti də arta bilər. Bizim ölkəmizdən fərqli olaraq, idxal etdiyimiz ölkələrdə benzinin qiyməti neftin qiyməti ilə birbaşa bağlıdır. Yəni, neft bahalaşanda benzin də bahalaşır, neft ucuzlaşanda isə benzin də ucuzlaşır.”

Ekspert hesab edir ki, yaxın zamanda ciddi bahalaşma gözlənilmir:

“2026-cı ildə Aİ-95 markalı benzinin qiymətində artım ehtimalı azdır, çünki neftin qiymətində də artım proqnozlaşdırılmır. Artım olsa belə, bu, simvolik xarakter daşıya bilər. ABŞ-ın Venesuela ilə bağlı siyasəti nəticəsində həmin ölkənin neftinin bazarlara çıxışı genişlənə bilər ki, bu da qiymətlərin bir qədər enməsinə səbəb ola bilər.”