Qrip əsasən yüksək hərarət, halsızlıq, baş və əzələ ağrıları ilə müşayiət olunsa da, xəstəlikdən sonra həftələrlə davam edən şiddətli öskürək bir çox insanı narahat edir. Bəzən qızdırma və digər simptomlar keçsə də, öskürəyin davam etməsi gündəlik həyata, yuxu rejiminə və ümumi həyat keyfiyyətinə mənfi təsir göstərir. Xüsusilə soyuq hava, fiziki gərginlik və gecə saatlarında öskürəyin artması narahatlıq doğurur.

Qripdən sonra öskürəyin uzun müddət davam etməsinin səbəbləri ilə bağlı tibb elmləri doktoru, professor Adil Qeybulla açıqlama verib.

Professorun sözlərinə görə, öskürək bronxial epitelin qıcıqlanması nəticəsində yaranan müdafiə refleksidir və əsasən virus mənşəli yuxarı tənəffüs yolları infeksiyalarında müşahidə olunur:

“Öskürək bir müdafiə reaksiyasıdır. Bu refleks bronxial epitelin qıcıqlanması və həmin nahiyədə iltihabi prosesin getdiyini göstərir. Öskürək respirator xəstəliklərin əsas əlamətlərindən biridir. Bundan əlavə, siqaret çəkənlərdə və xroniki allergik xəstəlikləri olan şəxslərdə də davamlı öskürək müşahidə oluna bilər”.

Həkim bildirib ki, öskürəyin qəfil başlaması və burun tutulması, bəlğəmin gəlməsi, qızdırma, baş və bel ağrıları, ümumi halsızlıq, zəiflik və əzələ ağrıları ilə müşayiət olunması yuxarı tənəffüs yollarının iltihabına, xüsusilə virus mənşəli respirator infeksiyalara işarə edir.

Adil Qeybulla xəstəliyə laqeyd yanaşmağın öskürəyin uzanmasına və ağırlaşmalara səbəb olduğunu vurğulayıb:

“Xəstələr çox vaxt qripi ayaqüstə keçirir, ona ciddi əhəmiyyət vermirlər. Bu isə ağırlaşmalara yol açır. Uzunmüddətli öskürək də əsasən xəstəliyə biganə yanaşma ilə bağlıdır. Xəstələr yataq rejiminə əməl etməli, bol maye qəbul etməli, başqalarını yoluxdurmamağa çalışmalı və zərurət olduqda həkim təyinatlarına riayət etməlidirlər”.

Professor əlavə edib ki, əksər hallarda orqanizm virus infeksiyası ilə öz gücü hesabına mübarizə apara bilir. Lakin bəzi hallarda xəstəliyin gedişi daha ağır ola və bu, virus yükündən, immun sistemin vəziyyətindən və digər amillərdən asılıdır. Belə vəziyyətlərdə isə müalicənin mütləq şəkildə davam etdirilməsi vacibdir.