Bu gün İctimai Televiziya və Radio Yayımları Şirkəti ‎‎(İTV) Yayım Şurasının baş direktoru vəzifəsinə seçki keçirilib.‎

‎“İctimai televiziya və radio yayımı haqqında” qanunun müvafiq maddələrinin tələblərinə uyğun ‎olaraq, Yayım Şurası tərəfindən Qasımov Balakişi Ələkbər oğlu yenidən 4 il müddətinə İTV-nin ‎baş direktoru seçilib.‎

İclasda Yayım Şurasının 9 üzvündən 9-u iştirak edib ki, onların da hamısı gizli səsvermədə ‎səslərini Balakişi Qasımova veriblər.‎



Balakişi Qasımov 20 oktyabr 1978-ci ildə Bakı şəhərində anadan olub. 1999-cu ildə Azərbaycan ‎Dövlət İqtisad Universitetinin Biznes üzrə menecment fakültəsinin Mühəndis iqtisadiyyatı və ‎idarəetmə ixtisasını bitirib. 2001-ci ildə isə eyni universitetin İstehsal sistemlərinin idarəedilməsi ‎fakültəsinin Mühəndis iqtisadiyyatı və idarəetmə ixtisası üzrə magistraturasını bitirib. İTV-nin baş ‎direktoru seçilənə qədər Gametv.az prodüser mərkəzinin rəhbəri vəzifəsində çalışıb. O, eyni ‎zamanda, Azərbaycan Televiziyasında yayımlanan beynəlxalq lisenziyalı “Əlaçı” (“Brainist”), “61!” ‎‎(“Jeopardy!”), “Breyn-rinq”, "Kim? Harda? Nə vaxt?" verilişlərinin baş prodüseri və rejissoru ‎olub.‎

Beynəlxalq "Kim? Harda? Nə vaxt?" klubları assosiasiyası tərəfindən 2010-cu ildə ilin adamı ‎seçilib. 2010-cu ilin yekunlarına əsasən, "Büllur bayquş", "Brilyant bayquş", "Klubun ən yaxşı ‎kapitanı" poqonu mükafatlarına layiq görülüb.‎

‎2017-ci ildə "Kim? Harda? Nə vaxt?" hərəkatının inkişafına verdiyi töhfələrə görə Vladimir ‎Voroşilov mükafatının laureatı olub.‎