“Respublikada beynəlxalq standartlara cavab verən bir dənə də olsun - nə erməni, nə beynəlxalq, nə də özəl universitet var”.

Bu sözləri Ermənistanın baş naziri Nikol Paşinyan bildirib.

“Biz universitetlərin beynəlxalq standartlara uyğun lisenziyalaşdırılmasını və akkreditasiyasını elan etsək, Ermənistanda istisnasız olaraq bütün universitetlər bağlanmalı olar”, - deyə baş nazir hökumətin iclasında vurğulayıb.

Onun sözlərinə görə, bu səbəbdən gənclər beynəlxalq meyarlara cavab verən təhsil almaq imkanından məhrum olurlar. Baş nazir əlavə edib ki, Ermənistanın yalnız bir neçə universiteti əcnəbi tələbələri cəlb edir.
O xatırladıb ki, hökumət ortamüddətli perspektivdə ölkənin bütün universitetlərini planlaşdırılan Akademik Şəhərciyə köçürmək niyyətindədir və 2030-cu ilə qədər təhsilin inkişafı strategiyasına əsasən, respublikada səkkizə qədər dövlət universiteti fəaliyyət göstərməlidir.