AZAL-a məxsus Bakı-Qroznı reysini yerinə yetirən təyyarənin qəzaya uğraması bir neçə məsələni gündəmə gətirib. Onlardan biri də təyyarənin Rusiya tərəfindən vurulmasıdır.

Əgər xəbər təsdiqini taparsa ki, doğrudan da Azərbaycana məxsus təyyarəni Rusiya vurub, o zaman Moskvanın cəzalandırılması mümkündürmü?

Məsələn, Azərbaycan Rusiyanı məhkəməyə verə, ondan təzminat və yeni təyyarə tələb edə bilərmi?

Vəkil Elçin Sadıqov deyib ki, Azərbaycan baş verənlərlə bağlı beynəlxalq məhkəməyə müraciət edə bilər.

Onun sözlərinə görə, bu müraciət bir çox məsələnin həllinə dəstək olar:

“Rusiyanın ölkəmizə məxsus sərnişin təyyarəsini vurması faktı ilə bağlı dövlətimiz Beynəlxalq Ədalət Məhkəməsinə müraciə edə bilər. Əminəm ki, bu faktla əlaqədar Rusiyanın cəzalandırılması barədə qərar qəbul ediləcək. Məhkəməyə müraciət həmin cinayəti törədən şəxslərin cəzalandırılmasında və vurulmuş zərərin tam ödənilməsində əsas rol oynaya bilər”.

Vəkil kompensasiya ala bilməyin mümkünlüyünü vurğulayıb:

“Məsul şəxslərin cinayət məsuliyyətinə cəlb edilməsi, həyatını və sağlamlığını itirən hər bir şəxsə isə Beynəlxalq Mülki Aviasiya qaydalarına uyğun (SDR) kompensasiya ödənilməsi mümkündür”.

Xatırladaq ki, AZAL-a məxsus J2-8243 nömrəli Bakı-Qroznı reysini yerinə yetirən “Embraer” E190 təyyarəsi dekabrın 25-də Aktau şəhərinin yaxınlığında qəzaya uğrayıb. Təyyarədə beşi ekipaj üzvü olmaqla ümumilikdə 67 nəfər (37 Azərbaycan, 16 Rusiya, altı Qazaxıstan və üç Qırğızıstan vətəndaşı) olub. Son məlumatlara görə, faciə nəticəsində 39 nəfər həlak olub, 28 nəfər yaralanıb