Yeni seçilmiş Roma Papası XIV Leo vəzifəsinin icrasına başlamasından sonra ilk dəfə Ukrayna Prezidenti Volodimir Zelenskini qəbul edib. Görüş Romada baş tutub və Ukrayna nümayəndə heyətinin iştirakı ilə keçirilib. Bu barədə Zelenski özünün “Telegram” kanalında məlumat paylaşıb.

Ukrayna lideri bildirib ki, pontifik dünyada milyonlarla insan üçün sülhün ümid rəmzidir və onun “səlahiyyəti və səsi” Ukraynada davam edən hərbi əməliyyatların dayandırılmasında mühüm rol oynaya bilər.

“Ukrayna və Rusiya arasında birbaşa danışıqlar platformasına çevrilmək istəyinə görə Vatikana təşəkkür edirəm. Biz real nəticələr naminə istənilən formatda dialoqa hazırıq”, – deyə Zelenski qeyd edib.

Görüşdə həmçinin regional sabitlik, humanitar məsələlər və sülh təşəbbüsləri müzakirə olunub.