Prezident İlham Əliyev Azərbaycan Respublikası vətəndaşlarının 2025-ci il iyulun 1-dən 30-dək müddətli həqiqi hərbi xidmətə çağırılması və müddətli həqiqi hərbi xidmət hərbi qulluqçularının ehtiyata buraxılması ilə bağlı Sərəncam imzalayıb.

Sərəncama əsasən, 2007-ci ildə doğulmuş və çağırış gününədək (həmin gün də daxil olmaqla) 18 yaşı tamam olmuş, eləcə də 1995–2006-cı illərdə doğulmuş, yaşı 30-dək olan, Azərbaycan Respublikasının Silahlı Qüvvələrində müddətli həqiqi hərbi xidmət keçməmiş, müddətli həqiqi hərbi xidmətə çağırışdan möhlət hüququ olmayan və ya çağırışdan azad edilməmiş şəxslər 2025-ci ilin iyul ayında hərbi xidmətə çağırılacaqlar.

Eyni zamanda, “Hərbi vəzifə və hərbi xidmət haqqında” Qanunun 38.1.1-ci maddəsinə uyğun olaraq, xidmət müddətini başa vurmuş müddətli həqiqi hərbi xidmət hərbi qulluqçuları həmin tarixlərdə – iyulun 1-dən 30-dək ehtiyata buraxılacaqlar.

Sərəncamın icrası ilə bağlı Nazirlər Kabinetinə müvafiq qanunvericiliyə uyğun tədbirlərin görülməsi tapşırılıb.