Mayın 22-də Bakı Ağır Cinayətlər Məhkəməsində Azərbaycanda şəriət qanunları ilə idarə olunan “Kərimə” adlı dövlət yaratmaq iddiası ilə ittiham olunan 6 nəfərin məhkəmə prosesi başa çatıb. Hakim Şəlalə Həsənovanın sədrliyi ilə keçirilən prosesdə təqsirləndirilən şəxslərə ağır cəzalar verilib.

Məhkəmənin hökmünə əsasən, Arif Cümşüdov və Anar İsayev 17 il, Xəqani Məmmədov, Sənan Məmmədov, İqbal Axundov və Tərzan Qaraşov isə hər biri 8 il müddətinə azadlıqdan məhrum ediliblər. Onlar cəza müddətlərini ciddi rejimli cəzaçəkmə müəssisəsində keçirəcəklər.

İttihama görə, İranda yaşayan Rufulla Axundzadə və Bəxtiyar Bayramovun göstərişi ilə Arif Cümşüdov Azərbaycanda silahlı iğtişaşlar törədərək, dini əsaslarla yeni bir dövlət qurmaq məqsədilə “müqavimətçi dəstə” formalaşdırıb. O, bu məqsədlə bir sıra şəxsləri gizli görüşlərə cəlb edərək onlara təlimatlar verib. Anar İsayevə də eyni istiqamətdə tapşırıqlar verildiyi və onun Cümşüdovla əlaqələndirildiyi bildirilir.

Təqsirləndirilən şəxslər, həmçinin, sosial şəbəkələrdə və ictimai yerlərdə İran və dini radikalizm lehinə təbliğat aparmaqda da ittiham olunublar.

Dövlət Təhlükəsizliyi Xidmətinin apardığı araşdırmalara əsasən, onlara qarşı Azərbaycan Respublikası Cinayət Məcəlləsinin 234.1-1-ci (külli miqdarda narkotik vasitələrin qanunsuz əldə olunması, saxlanması və daşınması) və 278.2-ci (konstitusiya quruluşunun zorla dəyişdirilməsinə yönəlmiş dini motivli hərəkətlər) maddələri ilə ittiham irəli sürülüb.