Prezident İlham Əliyev mayın 26-da məhkum edilmiş bir sıra şəxslərin əfv olunması haqqında sərəncam imzalayıb. Bu barədə “Yeni Sabah” məlumat yayıb.

Sərəncamda bildirilir ki, müxtəlif şəxslərin – məhkumların özlərinin, ailə üzvlərinin, həmçinin Azərbaycan Respublikasının İnsan Hüquqları üzrə Müvəkkilinin (Ombudsmanın) əfv müraciətləri nəzərə alınıb. Müraciətlərə baxılarkən məhkumların şəxsiyyəti, səhhəti, ailə vəziyyəti, törətdikləri cinayətlərin xarakteri və ictimai təhlükəlilik dərəcəsi, cəzanın çəkilmiş hissəsi və bu müddətdəki davranışları nəzərə alınıb. Qərar humanizm prinsiplərinə əsaslanaraq və Azərbaycan Respublikası Konstitusiyasının 109-cu maddəsinin 22-ci bəndinə uyğun olaraq verilib.

Əfv sərəncamı ümumilikdə 220 nəfəri əhatə edir. Onlardan 175-i cəzasının qalan hissəsindən azad olunub. Əfv olunanlar arasında bir nəfər xarici vətəndaş – Fransa vətəndaşı Teo Klerk Hüqo da var. O, 2024-cü ilin sentyabrında Bakıda metro tunelinə qanunsuz daxil olaraq qatarların üzərində qraffitilər çəkməkdə təqsirli bilinərək 3 il həbs cəzasına məhkum edilmişdi.

Qeyd edək ki, əfv siyahısında siyasi məhbus kimi tanınan şəxslərin adları yer almayıb. Bu fakt hüquq müdafiəçilərinin tənqidinə səbəb olub. Onlar sərəncamın siyasi motivli həbslərlə bağlı ictimai gözləntiləri qarşılamadığını bildirirlər.