Slovakiya, Bratislava – 14 iyun 2025 – Azərbaycanın Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev bildirib ki, ölkəyə hazırda kömək deyil, bərabərhüquqlu əməkdaşlıq və strateji tərəfdaşlıq lazımdır.

O, bu fikirləri Bratislavada keçirilən “GLOBSEC 2025” forumunun “Orta Dəhliz: Yeni Geosiyasi və İqtisadi Həyat Xətti” mövzusunda panelində çıxışı zamanı səsləndirib.

“Azərbaycana kömək yox, əməkdaşlıq və tərəfdaşlıq lazımdır. Çünki bizim öz investisiya imkanlarımız və güclü əməkdaşlıq əlaqələrimiz var. Bakı-Tbilisi-Qars layihəsinə baxın – bu layihə həyata keçiriləndə Avropa və ABŞ fondları maliyyəni dayandırdı, amma biz öz vəsaitimiz hesabına onu reallaşdırdıq”, – deyə Hacıyev qeyd edib.

Prezident köməkçisi həmçinin vurğulayıb ki, Azərbaycan region ölkələri, o cümlədən Mərkəzi Asiya dövlətləri ilə nəqliyyat infrastrukturunun inteqrasiyası istiqamətində ciddi addımlar atır: “Biz bütün əsas nəqliyyat sistemimizi Mərkəzi Asiyadakı qardaşlarımızla əlaqələndirmişik. Bu gün Çin, Qırğızıstan və Özbəkistan öz dəmir yolu sistemini birgə qurur və bu da Mərkəzi Asiyaya çatmaq üçün 900 kilometrlik daha qısa marşrut yaradacaq”, – deyə o bildirib.

Hikmət Hacıyev əlavə edib ki, Trans-Xəzər dəhlizi çərçivəsində bütün bu proseslər əlaqələndirilir, lakin Avropa İttifaqının proseslərə yanaşması hələ də qeyri-müəyyəndir: “Avropa İttifaqı haradadır? Bəli, siz tərəfdaş kimi bizə qoşula bilərsiniz, lakin hələ də Aİ-nin konkret nə istədiyini dəqiq görmürük. TRASEKA müəyyən töhfə verib, lakin bu, artıq köhnəlmiş yanaşmadır. Bizə yeni şüşədə yeni şərab – yəni yeni baxış, yeni strategiya lazımdır”, – deyə Hacıyev bildirib.