Zərdab Rayon İcra Hakimiyyətinin başçısı Mərdan Camalzadənin Yuxarı Seyidlər kənd inzibati ərazi dairəsi üzrə nümayəndəsi İntizam Məmmədov inzibati qaydada həbs edilib.

Məlumata görə, dövlət məmuru “3 yol” adlanan ərazidə yüksək səslə nalayiq ifadələr işlədərək ictimai asayişi pozub və polis əməkdaşlarının qanuni tələblərinə tabe olmayıb. Hadisə onun Zərdab şəhərində “Renault Megane” markalı avtomobili idarə edərkən təhlükəsizlik kəmərindən istifadə etməməsi səbəbilə saxlanılmasından sonra baş verib.

Polisin tələbinə narazılıqla yanaşan İntizam Məmmədov yol polisi əməkdaşlarından birinə “gəl sənə hörmət edim, çıxım gedim” deyərək, hadisə yerindən uzaqlaşıb. Daha sonra o, “3 yol” adlanan ərazidə yenidən saxlanılıb və bu zaman səs-küy salaraq nalayiq ifadələr işlədib, polis əməkdaşlarını hədələyib.

1961-ci il təvəllüdlü İntizam Məmmədov barəsində İnzibati Xətalar Məcəlləsinin 510-cu (xırda xuliqanlıq) və 535.1-ci (polisin qanuni tələbinə tabe olmama) maddələri ilə protokol tərtib olunub və məsələ məhkəməyə göndərilib.

Məhkəmədə ifadə verən Məmmədov hadisə günü şəxsi problemlər, o cümlədən bank kartının bloklanması səbəbilə əsəbi olduğunu və özünü itirərək bu hərəkətləri etdiyini bildirib. Səhvini etiraf edən məmur yaşı, səhhəti və dövlət qulluqçusu statusunu nəzərə alaraq cəzanın yüngülləşdirilməsini xahiş etsə də, məhkəmə onun barəsində 8 sutkalıq inzibati həbs qərarı çıxarıb.

Qeyd olunur ki, İntizam Məmmədovun cəza müddəti artıq başa çatıb və o, azadlığa buraxılıb.