Yerevan, 18 iyun 2025 — Azərbaycanın beynəlxalq axtarışa verdiyi erməni əsilli milyarder və iş adamı Samvel Karapetyan Yerevanda saxlanılıb. Onun hakimiyyəti zorla ələ keçirməyə çağırış etməkdə ittiham olunduğu bildirilir.

Milyarderin vəkilləri ittihamı qəbul etmədiklərini bəyan ediblər. Karapetyanın həbsi Baş nazir Nikol Paşinyanla Erməni Apostol Kilsəsi arasında gərginliyin artdığı bir dövrə təsadüf edir. İş adamı son günlər kilsəyə açıq dəstəyini ifadə edib və 17 iyunda verdiyi müsahibədə siyasətçiləri vəziyyəti həll etməyə çağıraraq, əks halda “kilsəyə qarşı kampaniyanı öz metodları ilə dayandıracaqlarını” demişdi.

Karapetyanın bu açıqlamasına cavab olaraq, Baş nazir Paşinyan sosial şəbəkədə ad çəkmədən sərt reaksiya verib: “Fahişəxanalıqla məşğul olan ‘ruhanilər’ və havadarları birdən-birə niyə belə fəallaşıblar? Narahat olmayın, biz onları yenidən zərərsizləşdirəcəyik. Bu dəfə birdəfəlik.”

Karapetyanın evində axtarış aparıldığı, daha sonra isə onun saxlanıldığı bildirilir.

Samvel Karapetyan Ermənistanda “Tashir Group” şirkətlər şəbəkəsinin sahibidir və ölkənin ən varlı şəxslərindən biri hesab olunur. O, həmçinin Erməni Apostol Kilsəsinin əsas maliyyə dəstəkçilərindən biridir. Karapetyan əsasən Rusiyada yaşayır.

Qeyd edək ki, Azərbaycan Baş Prokurorluğu tərəfindən 2021-ci ildə Samvel Karapetyan barəsində Dağlıq Qarabağa qanunsuz silah və hərbi texnika daşınması ittihamı ilə cinayət işi açılıb və o, beynəlxalq axtarışa verilib.