Ermənistanın baş naziri Nikol Paşinyan sosial şəbəkələrdə yerli istifadəçilərlə açıq söz savaşına girib.

Sosial media istifadəçisi Artur Soqoyan, Paşinyanı “Qarabağı satmaqda”, “Azərbaycana işləməkdə” ittiham edib. O, Ermənistan rəhbərliyinin siyasətini sərt tənqid edərək Paşinyanı milli maraqları tapdalamaqda günahlandırıb.

Paşinyan isə gözlənilmədən şərh bölməsində sərt və açıq cavabla çıxış edib:

“Mən türkün ayaqlarını yalayıram? Qarabağı mən satmışam? Bu və digər suallarınıza cavab vermək üçün sizi və belə düşünən hər kəsi ‘Təhsil dəbdədir’ hərəkatının toplantılarına dəvət edirəm. Əminəm ki, sizi maraqlandıran suallara cavab tapacaqsınız.”

Baş nazirin bu cavabı erməni ictimaiyyətində geniş müzakirələrə səbəb olub. Bəziləri onun bu şəkildə şəxsən cavab verməsini düzgün hesab etməyib, digərləri isə Paşinyanın şəffaflığa və xalqla birbaşa ünsiyyətə açıq olduğunu bildiriblər.

Qeyd edək ki, Nikol Paşinyan Qarabağ münaqişəsi və son regional razılaşmalar fonunda Ermənistan cəmiyyətinin bir hissəsinin ciddi narazılığı ilə üzləşib. Onun Azərbaycana güzəştlərə getdiyi iddiaları müxalif dairələr tərəfindən dəfələrlə gündəmə gətirilib.