Rusiya prezidenti Vladimir Putin Azərbaycanla münasibətlərdəki gərginliyi aradan qaldırmaq üçün Bakıya nümayəndə heyəti göndərməyə hazırlaşır. Bu barədə Rusiya xüsusi xidmət orqanlarına yaxınlığı ilə tanınan VÇK-OQPU Telegram kanalı məlumat yayıb.

Məlumata görə, hazırda Moskvada iki ölkə arasında yaranmış fikir ayrılıqlarını aradan qaldırmaq və qarşılıqlı anlaşmanı bərpa etmək məqsədilə nümayəndə heyəti formalaşdırılır. Bildirilir ki, nümayəndə heyəti vasitəsilə prezident Putinin şəxsi mesajı Azərbaycan tərəfinə çatdırılacaq.

Eyni zamanda, ehtimal olunur ki, bu səfər çərçivəsində həbs olunan şəxslərin qarşılıqlı “mübadiləsi” təklif edilə bilər.

Mənbənin iddiasına görə, qeyri-rəsmi nümayəndə heyətinə Rusiyanın fövqəladə hallar naziri Aleksandr Kurenkov rəhbərlik edə bilər. Qeyd olunur ki, Kurenkov prezident Putinin keçmiş şəxsi adyutantı olub və Azərbaycan hökumətindəki bəzi şəxslərlə şəxsi münasibətləri var.

Hazırda rəsmi qurumlar bu iddialara münasibət bildirməyib. Məsələ ilə bağlı əlavə məlumatların yaxın günlərdə açıqlanacağı gözlənilir.