İran Prezidenti Məsud Pezeşkian ona qarşı sui-qəsd cəhdi edildiyini açıqlayıb. Dövlət başçısının sözlərinə görə, hücum cəhdinin arxasında İsrail dayanıb, lakin plan uğursuzluqla nəticələnib.

Pezeşkian bu barədə amerikalı jurnalist Taker Karlsona verdiyi müsahibədə danışıb. Prezident jurnalistin “Sizə qarşı sui-qəsd olubmu?” sualına qısa və qəti cavab verib:
“Bəli, cəhd etdilər, amma uğursuz oldular.”

İran lideri bildirib ki, hadisə təxminən həftə yarım əvvəl, İran və İsrail arasında artan gərginlik dövründə baş verib. O, hücum cəhdinin ABŞ tərəfindən təşkil olunmadığını da vurğulayıb:

“Mən görüşdə idim, sonrakı addımları müzakirə edirdik. İsrail casuslarının topladığı kəşfiyyat məlumatlarının köməyi ilə bizim görüş keçirdiyimiz əraziyə zərbə endirməyə çalışdılar.”

İran tərəfi hadisə ilə bağlı rəsmi istintaqın aparılıb-aparılmadığı barədə hələlik əlavə açıqlama verməyib.