İran Prezidenti Məsud Pezeşkian Azərbaycan Prezidenti İlham Əliyevlə telefon danışığında İsrailin İrana qarşı həyata keçirdiyi hücumlarda Azərbaycan hava məkanından istifadə edib-etmədiyinin araşdırılmasını istəyib. Bu barədə məlumatı İranın dövlət mətbuatı yayıb.

İyunun 26-da baş tutan telefon zəngində Pezeşkian həmçinin Azərbaycan hökumətinə və xalqına, İsrail hücumları qarşısında İran xalqı ilə həmrəylik nümayiş etdirdiklərinə görə təşəkkürünü bildirib.

İran mənbələrinin verdiyi məlumata görə, Prezident İlham Əliyev cavabında Azərbaycanın İrana qarşı hücumları qəti şəkildə pislədiyini, günahsız insanların həlak olmasından dərin təəssüf hissi keçirdiyini vurğulayıb. O, həmçinin, İsrailin Azərbaycan səmasından istifadə etdiyi barədə yayılan şayiələri qətiyyətlə inkar edib.

Azərbaycan tərəfinin yaydığı rəsmi məlumat isə daha lakonik olub. Rəsmi pres-relizdə Prezident İlham Əliyevin Pezeşkianı İsraillə əldə olunan atəşkəs münasibətilə təbrik etdiyi, iki ölkə arasında əməkdaşlığın müzakirə olunduğu və İran prezidentinin yenidən Azərbaycana dəvət edildiyi qeyd olunub.

Xatırladaq ki, Azərbaycan tərəfi İsrail və İran arasında iyunun 13-də başlayan hərbi qarşıdurma ilə bağlı rəsmi mövqeyini yalnız bir dəfə — hadisələrin ilk günü — açıqlayıb. Xarici İşlər Nazirliyinin həmin gün yaydığı bəyanatda Azərbaycan bölgədə baş verən hərbi eskalasiyadan narahat olduğunu bildirərək, tərəfləri sülhə çağırmışdı.

Hazırda Azərbaycan rəsmiləri ölkənin hava məkanından istifadəyə dair iddialara münasibətdə səssiz qalmaqla bərabər, tərəfsiz və neytral mövqeyini qorumağa çalışır.