Milli Məclis Naxçıvan Muxtar Respublikasının Konstitusiyasına çoxsaylı və fundamental dəyişiklikləri təsdiqləyib. Dəyişikliklər Prezident İlham Əliyevin təsdiqindən sonra qüvvəyə minəcək. Bu dəyişikliklər muxtar statusun əsas məzmununu faktiki olaraq ortadan qaldırır və Naxçıvanın idarəçiliyini birbaşa Bakının nəzarətinə keçirir.

Əsas dəyişikliklər nədən ibarətdir?

Dəyişdirilmiş və əlavə olunmuş maddələr Naxçıvanın inzibati və siyasi idarəetməsində əsaslı dəyişikliklər yaradır:
1. Nazirlər Kabineti artıq Ali Məclisə tabe olmayacaq
Naxçıvan MR Nazirlər Kabineti bundan sonra Naxçıvan Ali Məclisinə tabe olmayacaq. Əvəzində, fəaliyyətini Azərbaycan Prezidenti ilə razılaşdırmaqla müəyyənləşdirəcək.
2. İcra başçılarını Prezident təyin edəcək
Naxçıvanın yerli icra hakimiyyəti orqanlarının rəhbərləri artıq Naxçıvan Ali Məclisi sədrinin təqdimatı əsasında Azərbaycan Prezidenti tərəfindən təyin olunacaq. (Maddə 32.4-1)
3. Ali Məclisə seçkiləri Prezident təyin edəcək
Naxçıvan Ali Məclisinə seçkilər də artıq Naxçıvan MR sədrinin təklifi ilə Azərbaycan Prezidenti tərəfindən təyin ediləcək. (Maddə 13, hissə II)
4. Sədr seçilmək üçün daimi yaşayış tələbi ləğv edilir
Ali Məclisin sədri seçilmək üçün əvvəllər tələb olunan “Naxçıvanda azı 5 il daimi yaşamaq” şərti aradan qaldırılır. (Maddə 29, hissə II)
5. Yeni maddələr əlavə olunur, biri isə tamamilə ləğv edilir
Konstitusiyaya iki yeni maddə əlavə olunub:
• Maddə 3-1: Naxçıvan MR-də Azərbaycan Prezidentinin səlahiyyətli nümayəndəliyinin təsisi.
• Maddə 28-1: Naxçıvan Ali Məclisinin buraxılması qaydaları.
Eyni zamanda, 5-ci maddə – “Ali vəzifəli şəxs” barədə olan hissə tamamilə konstitusiyadan çıxarılıb. Bu, muxtar respublika rəhbərliyinin əvvəlki hüquqi statusunun hüquqi əsaslarının aradan qaldırılması kimi qiymətləndirilir.
6. Preambula və digər maddələrdə də dəyişikliklər edilib