Fransa hökuməti Sakit okeandakı Yeni Kaledoniya arxipelaqı ilə yeni dövlətin yaradılmasına dair müqavilə imzalayıb. Bu barədə Politico nəşri məlumat yayıb.

Nəşrin yazdığına görə, Yeni Kaledoniyanın gələcəyini müzakirə edən rəqib siyasi hərəkatlar şənbə günü səhər saatlarında Fransadan tam müstəqil olmayacaq, lakin geniş muxtariyyətə malik yeni bir dövlətin yaradılması ilə bağlı razılığa gəliblər.

Bu razılaşma Yeni Kaledoniyaya daha çox siyasi və inzibati muxtariyyət qazandıracaq. Növbəti mərhələdə Fransa parlamentində müqavilənin ratifikasiyası və arxipelaqda referendumun keçirilməsi planlaşdırılır.

Xatırladaq ki, 2024-cü ilin yazında Yeni Kaledoniyada konstitusiyaya edilən dəyişikliklərlə bağlı genişmiqyaslı etirazlar və iğtişaşlar baş vermişdi. Hazırda bu ərazi Fransanın inzibati-ərazi qurumu hesab olunur və Parisin burada təmsilçisi Fransa Prezidenti tərəfindən təyin olunan Ali Komissardır. İcra hakimiyyəti isə yerli hökumətin əlindədir.