Həbsdə olan bloger Ata Abdullayevin anası Şəhla Yusifova və həyat yoldaşı, ABŞ vətəndaşı olan Emmori Ombudsman Aparatına müraciət ediblər. Onlar Ata Abdullayevin çəkilməmiş cəzasının bağışlanaraq, onun vaxtından əvvəl azadlığa buraxılmasını xahiş ediblər.

Müraciət edənlər bildiriblər ki, Ata Abdullayev indiyədək həbsxanada bütün qaydalara riayət edib və nümunəvi davranış nümayiş etdirib. Onlar bu amilin onun azadlığa buraxılması üçün əsas ola biləcəyini düşünürlər.

Qeyd edək ki, Ata Abdullayev 2019-cu ildə amerikalı iş xanımı Emmori ilə ailə həyatı qurub. O, 2021-ci ilin mart ayında Dövlət Təhlükəsizliyi Xidmətinin əməkdaşları tərəfindən saxlanılıb. 28 dekabr 2021-ci il tarixində isə Səbail Rayon Məhkəməsinin qərarı ilə 7 il müddətinə azadlıqdan məhrum edilib.

Ata Abdullayevə qarşı Cinayət Məcəlləsinin 182.2.2-ci maddəsi – hədə-qorxu ilə pul tələb etmə – üzrə ittiham irəli sürülmüşdü.