Milli Məclisin deputatı Tahir Rzayev parlament üzvlərinin gəlirləri ilə bağlı ictimai müzakirələrə münasibət bildirib. O, deputatların məzuniyyətə görə əlavə vəsait almadığını, yalnız aylıq maaşlarının əvvəlcədən verildiyini söyləyib.

“Bilirik ki, deputatlar məzuniyyətə çıxdıqda onlara əlavə pul verilmir, sadəcə maaşlarını birdəfəlik alırlar. Amma bu məsələ ictimaiyyət arasında yanlış anlaşılır. Ayda 15-20 min manat aldıqları deyilir, halbuki belə deyil. Bu cür faktlar şişirdilir”, – deyə Tahir Rzayev qeyd edib.

Deputat ictimai müzakirələrin bəzən məlumatsızlıqdan qaynaqlandığını bildirib: “Belə mövzuların gündəmə gətirilməsi insanların dünyagörüşündən və məlumatsızlığından irəli gəlir. Nə ehtiyac var bu məsələləri bu qədər qabartmağa?”

Tahir Rzayev millət vəkilinin sadə və ya kasıb görünməsinin doğru yanaşma olmadığını vurğulayıb: “Millət vəkili kasıb yaşamalı, kasıb geyinməlidirmi? O, ay ərzində bir neçə dəfə seçicilərlə görüşməyə gedir, müxtəlif tədbirlərdə iştirak edir. Deputatın həmin yerlərə nimdaş formada getməsi yaxşı olar? Bu cür müzakirələr bizə ucalıq gətirmir.”

Deputat sonda bildirib ki, cəmiyyətin gözləntiləri real imkanlarla uzlaşmalıdır və deputatların fəaliyyəti maddi tərəfdən deyil, iş prinsipləri ilə qiymətləndirilməlidir.