İsveçrə hökuməti Avropa İttifaqının 18-ci sanksiyalar paketinə qismən qoşularaq Rusiyaya qarşı tətbiq olunan məhdudiyyətləri genişləndirib. Ölkə hökumətinin rəsmi saytında yayılan məlumata görə, yeni siyahıya 14 fiziki və 41 hüquqi şəxs, eləcə də üçüncü ölkələrin 105 mülki gəmisi əlavə olunub.

Bundan başqa, 26 şirkət daha sərt ixrac nəzarəti məhdudiyyətlərinə məruz qalıb. Sanksiyalar avqustun 12-də saat 23:00-dan qüvvəyə minib.

Fiziki şəxslər arasında “Mosfilm”in baş direktoru Karen Şanazarov, iş qadını Tatyana Litvinenko, eləcə də Çin, Hindistan, İran və Azərbaycan vətəndaşları yer alır. Hüquqi şəxslər siyahısına Moskva Xüsusi Avadanlıqlar Mexaniki Zavodu, AO Polimer, N. N. Trofimov adına NPO Stekloplastik, Yakutsk Yanacaq və Enerji Şirkəti PAO, Ulyanovsk Maşınqayırma Zavodu, AO İjevsk Mexanika Zavodu və digər müəssisələr daxildir.

İsveçrənin sanksiya siyahısına həmçinin Çin, Sinqapur, Hindistan, Türkiyə və Birləşmiş Ərəb Əmirliklərindən olan bəzi şirkətlər də əlavə edilib.

Bundan başqa, İsveçrə Aİ-nin Rusiya neftinin qiymət limitini bir barel üçün 60 dollardan 47,6 dollara endirmək təşəbbüsünə də qoşulub. Bu tədbir 3 sentyabr 2025-ci ildən qüvvəyə minəcək.