Dekabrın 16-da Avropa İttifaqı Şurası Rusiyanın Ukraynaya qarşı qanunsuz təcavüzünü davam etdirmək imkanlarını məhdudlaşdırmaq üçün yeni fərdi sanksiyalar paketi qəbul edib.

Aİ-nin məlumatında deyilir ki, sanksiyalar "əvvəlki sanksiyalardan yayınma probleminin həllinə yönəlib, Putinin kölgə donanmasını hədəf almaq və Rusiyanın hərbi-sənaye kompleksini zəiflətmək məqsədi daşıyır".

Sanksiyalara məruz qalanlar arasında 54 fiziki şəxs və 30 təşkilat var.

Bu şəxslər Kiyevdə "Oxmadit" uşaq xəstəxanasına raket zərbəsinin endirilməsinə görə məsul olan hərbiçilər, enerji sektorunda fəaliyyət göstərən şirkətlərin menecerləri, ukraynalı uşaqların deportasiyasına görə məsul şəxslər, həmçinin Şimali Koreyanın yüksək vəzifəli şəxsləridir.

Təşkilatlara gəlincə, bu, Rusiya hökumətinə gəlir təmin edən Rusiyanın müdafiə şirkətləri və xammal neftin daşınmasına görə cavabdeh olan gəmiçilik şirkətləridir.

Siyahıda kimya zavodu və Rusiya hərbiçilərinə logistika dəstəyində iştirak edən mülki aviaşirkət də var.

İlk dəfə olaraq Aİ Rusiyaya PUA komponentləri və mikroelektronika tədarük edən müxtəlif Çin şirkətlərinə qarşı tam sanksiyalar (səfər qadağaları, aktivlərin dondurulması, iqtisadi resursların verilməsinin qadağan edilməsi) tətbiq edir.

"Putinin kölgə donanmasına" gəlincə, bu, Rusiya neftini və oğurlanan Ukrayna taxılını daşıyan gəmilərdir. Sanksiyalar tətbiq edildikdən sonra bu gün onların sayı müxtəlif ölkələrdən 79 ədədə çatır.

Yeni siyahıda Rusiyanın hərbi-sənaye kompleksini dəstəkləyən 32 subyekt də var. Bu, Çin, Hindistan, iran, Serbiya və Birləşmiş Ərəb Əmirliklərinin şirkətləridir.