Avqustun 21-də Azərbaycan Respublikasının Prezidenti İlham Əliyev və birinci xanım Mehriban Əliyeva Toğanalı–Kəlbəcər–İstisu avtomobil yolunda həyata keçirilən işlərlə tanış olublar. Dövlət başçısı yolun 13,5-ci kilometrliyində inşa edilən və uzunluğu 11,7 kilometr olan Murovdağ tunelinin texniki açılışını edib.

Azərbaycan Avtomobil Yolları Dövlət Agentliyinin İdarə Heyətinin sədri Saleh Məmmədov Prezidentə və birinci xanıma layihə çərçivəsində görülmüş və hazırda icra olunan işlər barədə məlumat verib.

Qeyd edək ki, 2021-ci ilin avqustunda yolun təməlqoyma mərasimində də Prezident İlham Əliyev və birinci xanım iştirak etmişdilər. Dövlət başçısının tapşırığına əsasən Qarabağ və Şərqi Zəngəzur iqtisadi rayonlarında həyata keçirilən ən mühüm infrastruktur layihələrindən biri olan Toğanalı–Kəlbəcər–İstisu avtomobil yolunun ümumi uzunluğu 82 kilometrdir. Bunun 56 kilometri Toğanalı–Kəlbəcər, 26 kilometri isə Kəlbəcər–İstisu hissəsindən ibarətdir.

Murovdağ silsiləsindən keçən yolun ən mürəkkəb hissəsi üçün 1700–3250 metr yüksəklikdə təhlükəsiz nəqliyyat təmin etmək məqsədilə tunelin tikintisi zəruri sayılıb. Uzunluğu 11,7 kilometr olan Murovdağ tuneli dünyanın ən iri avtomobil tunellərindən biri hesab olunur. Belə ki, bu göstəriciyə görə o, dünyada 18-ci, Avropada 5-ci, MDB məkanında isə birinci yerdədir. Tunel iki gediş və iki gəliş olmaqla 4 hərəkət zolağından ibarətdir.

Layihə çərçivəsində ümumi uzunluğu 2636 metr olan əlavə dörd tunel də inşa edilir və əsas texniki işlərin böyük hissəsi artıq yekunlaşdırılıb. Hazırda Toğanalı–Kəlbəcər–İstisu avtomobil yolu üzrə işlərin 87 faizi icra olunub.

Yeni yol Göygöl rayonunun Toğanalı kəndindən başlayaraq işğaldan azad edilmiş Kəlbəcərdən keçməklə məşhur İstisu istirahət zonasına qədər uzanır. Bu yol bölgənin yaşayış məntəqələri ilə yanaşı, kənd təsərrüfatı və turizmin inkişafına da mühüm töhfə verəcək.

Çətin coğrafi şəraitdə bu cür strateji əhəmiyyətli layihənin reallaşdırılması Prezident İlham Əliyevin rəhbərliyi ilə işğaldan azad olunmuş ərazilərin sürətli bərpasının və müasir infrastruktur quruculuğunun prioritet olduğunu bir daha göstərir.