Rusiyalı siyasi şərhçi, keçmiş deputat Sergey Markov Rusiya Ədliyyə Nazirliyinin qərarı ilə “xarici agent” elan olunub. Nazirliyin məlumatında qeyd olunur ki, Markov “xarici agent” və “arzuolunmaz” şəxslərlə bağlı məlumatların yayılmasında, həmçinin xarici media orqanlarına müsahibələr verməkdə ittiham edilir.

Markov indiyədək hökumətyönlü mövqeyi ilə tanınırdı. O, 2007–2011-ci illərdə Dövlət Dumasının deputatı, Avropa Şurası Parlament Assambleyasının üzvü olub. 2012-ci ildə Vladimir Putinin prezident seçkilərində etibarlı nümayəndəsi kimi çıxış edib. 2018-ci ildə Ukrayna, 2022-ci ildə isə Rusiyanın Ukraynaya qarşı müharibəsindən sonra Kanada onun adını sanksiyalar siyahısına daxil edib.

Kremlə yaxın jurnalist Aleksandr Yunaşev “Telegram” kanalında yazıb ki, Markovun “xarici agent” siyahısına salınmasının əsas səbəbi ötən ay Şuşada keçirilən media forumundakı çıxışıdır. Forumda Markov prezident İlham Əliyevi “parlaq intellekt”, “çox təcrübəli müasir lider” və “qələbəni tam bərpa etmiş ölkənin rəhbəri” kimi səciyyələndirib.

Həmin tədbirdə İlham Əliyev həm Rusiyanı tənqid etmiş, həm də Ukrayna milli batalyonlarının şevron kolleksiyasını hədiyyə olaraq qəbul etmişdi. Təqdimat zamanı gülərək fotokameralara düşən Markovun görüntüləri Rusiyada sərt reaksiya doğurub.

Moskvalı hərbi müxbir Aleksandr Kots onun çıxışını “iyrənc” adlandırıb. Yazıçı Roman Antonovski politoloqun dərhal “xarici agent” elan edilməsini tələb edib. “Alex Parker Returns” adlı “Telegram” kanalı isə Markovu “Rusiyaya qarşı informasiya müharibəsi aparmaqda” və “azərbaycanlılardan pul alaraq onların mövqeyini təbliğ etməkdə” ittiham edib.

Markov isə ittihamlarla razılaşmadığını deyib:

“25 ildir Vladimir Putinin siyasətini dəstəkləyirəm. Hazırda informasiya fırtınası altındayam, deyilənlərin yarısı yalandır. Ölkəni tərk etməyəcəyəm, Rusiya mənim vətənimdir və həmişə Rusiyanın yanında olacağam”.

Politoloq həmçinin Rusiya hökumətinin bütün addımlarını legitim hesab etdiyini və məsələləri yalnız qanun çərçivəsində həll edəcəyini bildirib.

Xatırladaq ki, Moskva–Bakı münasibətləri son aylarda ciddi şəkildə gərginləşib. 2024-cü il dekabrın 25-də AZAL təyyarəsinin vurulması ilə bağlı Azərbaycan prezidenti İlham Əliyev Rusiya ordusunu ittiham etmişdi. 2025-ci ilin iyununda isə Rusiyada azərbaycanlılara, ardınca Azərbaycanda rus vətəndaşlara qarşı reydlər və həbslər başlamışdı.